Bakı. Trend:
İran və ABŞ arasında hərbi münaqişəyə son qoymaq barədə
razılaşma dəniz yolu ilə neft daşınmasının əvvəlki səviyyələrə
sürətlə bərpasına gətirib çıxarmayacaq.
Trend xarici
mediaya istinadla xəbər verir ki, bunu “Rystad Energy” konsaltinq
şirkətinin neft bazarı analitiki Paola Rodrigez-Masiu bildirib.
O qeyd edib ki, Hörmüz boğazının 30 gün ərzində mərhələli
şəkildə yenidən açılmasını nəzərdə tutan nikbin ssenaridə belə,
həcmlərdə əhəmiyyətli bir bərpa iyun ayına qədər baş verməyəcək və
yüklərin emal limanlarına çatdırılması bundan sonra daha dörd-altı
həftə çəkəcək.
Onun sözlərinə görə, qlobal bazarlar atəşkəslə bağlı başlıqları
təchizatla bağlı başlıqlarla qarışdırmamalıdır.
Rodrigez-Masiu əlavə edib ki, münaqişənin bitməsindən
altı-səkkiz həftə ərzində gəmiçiliyin bərpası gəmiçilik
bazarlarının struktur xüsusiyyətidir. Analitik vurğulayıb ki,
fiziki axınların iyul ayında böhrandan əvvəlki səviyyənin 80-90%-nə
qayıtması gözlənilir.
