Bakı.Trend:
Laçın rayonunda xidmət edən şəxsi heyətin döyüş hazırlığı və
məişət şəraitləri ilə tanış olmaq üçün media-tur keçirilib.
Trend xəbər
verir ki, səfərin məqsədi Laçın rayonunda yerləşən hərbi hissədə
xidməti döyüş fəaliyyətinin təşkili, eləcə də. orada Azərbaycan
Ordusunun hərbi qulluqçuları üçün yaradılan şəraitlə tanış olmaq
olub.
Əvvəlcə media nümayəndələri əsgər yeməkxanasında olub.
Yeməkxanada hərbi qulluqçular gündəlik təzə və yüksək kalorili
qida, həmçinin, digər təminat növləri ilə tam təmin edilir. Daha
sonra onlar hərbi hissənin müasir tələblərə cavab verən əsgər
yataqxanasında da olublar. Burada da hərbi qulluqçuların məişət
şəraitinin yaxşılaşdırması üçün lazımi işlər görülür.
Jurnalistlər daha sonra hərbi qulluqçuların təlim prosesinə və
snayperlərin maskalanma prosesinə də şahidlik ediblər.
Media nümayəndələri hərbi hissədə yaradılan şəraitlə tanış
olduqdan sonra hərbi qulluqçularla həmsöhbət olmaq imkanı da əldə
ediblər.
Azərbaycan ordusunun hərbi qulluqçusu bildirib ki, azad olunan
ərazilərimizdə xidmət etmək, vətənin keşiyində durmaq
qürurvericidir:
“Hazırda xidmət etdiyimiz hərbi hissədə əsgər və zabitlər üçün
bütün şərait yaradılıb. İstər təlimlər, istərsə də asudə
vaxtlarımızın keçirilməsi üçün hər şey var. Ailələrimizlə görüşmək
üçün də bizə şans yaradılır, ailə üzvlərimizlə görüşə bilirik. Mən
artıq bir neçə ildir bu hərbi hissədə xidmət edirəm və bununla fəxr
edirəm”.
Azərbaycan ordusunun digər bir hərbi qulluqçusu qeyd edib ki,
həm torpaqlarımızın işğaldan azad edilməsində iştirak edib, həm də
bu gün vətənin keşiyində qürurla dayanır:
“Baxmayaraq ki, torpaqlarımız cəmi bir neçə ildir işğaldan azad
olunub, bu illər ərzində Ali Baş Komandan İlham Əliyevin göstərdiyi
qayğı nəticəsində məişət şəraiti, qida təminatı və yolların
qurulması yüksək səviyyədədir. Hərbi hissəmizdə bütün şəraitlər
mövcuddur, çamaşırxanadan tutmuş yeməkxanaya qədər bütün şəraitimiz
gözəldir. Qidalanma əla səviyyədədir, təlimlərimiz vaxtında
keçirilir, hər şey qaydasındadır. Ailəli qulluqçularımız da
mütəmadi olaraq ailələrinə baş çəkə bilirlər”.
