Bakı.Trend:
Artıq yay tətilinin bitməsinə sayılı günlər qalır. Tətilin
bitməsi həmçinin rayonlarda yaşayan tələbələrin də yenidən şəhərə
qayıtması və sərnişin sıxlığının artması deməkdir. Ali məktəblərin
əksəriyyətinin paytaxtda yerləşməsi buraya hər il on minlərlər yeni
tələbənin gəlişi deməkdir. On minlərlə tələbənin Bakıya üz tutması
digər ictimai nəqliyyat vasitələrində olduğu kimi metroda da
sıxlığa səbəb olur.
Bəs Bakı Metropoliteni yeni tədris ilinə hazırdırmı?
Trend-in
sorğusuna cavab olaraq Bakı Metropolitenindən bildirilib ki,
metropolitendə yeni tədris mövsümünün başlanması ilə əlaqədar
hazrlıq işləri planlaşdırılmış qaydada davam etdirilir:
“İctimaiyyətə cari ilin may ayında verilmiş məlumata əsasən,
Bakı metropolitenində 2009-cu ildən sonra ilk dəfə intervalların
azaldılmasına nail olunub. Sıxlığın qismən tənzimlənməsi, sərnişin
məmnunluğunun daha da artırılması baxımından bu addımlar müsbət
nəticə verib. Hazırda qatarların hərəkət qrafikinin payız-qış
mövsümünə uyğun qurulması ilə bağlı işlər yekun
mərhələsindədir.
Bununla yanaşı, yeni mövsümdə müxtəlif qurum, müəssisə və
təşkilatların iş rejimi ilə bağlı məlumatların toplanması və emal
edilməsi, paytaxtın mobillik planlarında, digər ictimai nəqliyyat
vasitələrinin fəaliyyətindəki mümkün dəyişikliklər də diqqətdə
saxlanılır”.
Qeyd edilib ki, payız mövsümünün başlanması ilə əlaqədar
metropoliten infrastrukturunda texniki və insan resursları
baxımından hazırlıq tədbirləri görüləcək:
“Qatarlarla yanaşı, mütəmadi olaraq eskalatorların,
ventilyatorların iş rejimləri, sərnişinə xidmət avadanlıqları və
sistemləri nəzarətdə saxlanılır və bu istiqamətlərdə işlər və
monitorinqlər planlı şəkildə davam etdirilir.
Payız mövsümün, o cümlədən yeni tədris ilinin tələb və
xüsusiyyətləri nəzərə alınmaqla, infrastruktur və metropolitendən
istifadə qaydaları, yönləndirilmə, səmti rahatlıqla müəyyən etmə və
digər məqamlarla bağlı sərnişinlə birbaşa ünsüyyətdə olan işçi
personalının hazırlığı və təlimatlandırılması zamanında
yekunlaşdırılacaq”.
