Bakı. Trend:
Hollandiyanın ən böyük poçt operatoru “PostNL”, ABŞ-də yeni
gömrük qaydalarının qüvvəyə minməsi səbəbindən Birləşmiş Ştatlara
bağlama daşımalarını müvəqqəti dayandırıb.
Trend xəbər verir
ki, avqustun 29-dan tətbiq edilən dəyişikliklər 800 dollara qədər
olan mallar üçün əvvəl mövcud olan rüsumsuz həddi ləğv edib. Yeni
qaydaya əsasən, ABŞ-yə daxil olan hər bir paketdən idxal rüsumu
tutulacaq.
“Bu dəyişiklik o deməkdir ki, ABŞ Poçt Xidməti avqustun 29-dan
etibarən bağlamaları emal edə və ya buraxa bilməyəcək”, – “PostNL”
açıqlamasında bildirib.
Şirkət qeyd edib ki, ABŞ gömrüyü hələlik yeni prosedurun necə
tətbiq olunacağı barədə açıqlama verməyib. Buna görə də PostNL
avqustun 23-dən etibarən bağlamaların göndərilməsini
dayandırıb.
Eyni zamanda, məktublar və sənədlərin göndərilməsi adi qaydada
davam edir. Poçt operatoru ABŞ-yə çatdırılmanın alternativ
üsullarını araşdırdığını da vurğulayıb.
