Bakı. Trend:
Bakıda yanğın təhlükəli mağazanın fəaliyyəti dayandırılıb.
Trend
xəbər verir ki, bu barədə Fövqəladə Hallar Nazirliyi məlumat
yayıb.
Bildirilib ki, Fövqəladə Hallar Nazirliyinin Dövlət Yanğın
Nəzarəti Xidməti səlahiyyətləri daxilində ölkə ərazisində yanğın
təhlükəsizliyinin təmin edilməsi məqsədilə zəruri tədbirlərin
görülməsini davam etdirir.
Bu çərçivədə, Dövlət Yanğın Nəzarəti Xidməti tərəfindən Bakı
şəhəri, Nizami rayonu, Qara Qarayev prospekti, 39A ünvanında
yerləşən Qəribov Babək Allahverən oğluna məxsus işlənmiş
soyuducuların təmiri və satışı mağazasında keçirilən yoxlama zamanı
yanğın təhlükəsizliyi sahəsində çoxsaylı nöqsanların mövcud olduğu,
həmin nöqsanların insan həyatı və ya sağlamlığına, ətraf mühitə və
dövlətin əmlak maraqlarına birbaşa təhlükə yaratdığı müəyyən
edilib. Belə ki:
– obyektdə avtomatik yanğınxəbərverici siqnalizasiya qurğusu
quraşdırılmayıb;
– obyekt ilkin yanğınsöndürmə vasitələri ilə tam təmin
edilməyib;
– elektrik təsərrüfatı “Elektrik Qurğularının Quraşdırılması
Qaydası”nın tələblərinə uyğun quraşdırılmayıb, o cümlədən elektrik
naqilləri yanar materialların üzəri ilə çəkilib, elektrik
təsərrüfatına profilaktik baxış keçirilərək kabel və naqillərin
izolyasiyasının gərginliyə qarşı müqaviməti ölçülməyib;
– elektrik avadanlıqları artıq yüklənmədən və qısaqapanmadan
mühafizə edilməsi üçün qoruyucu aparatlarla təmin edilməyib;
– obyektin tavan hissələri yanar materialla üzlənib;
– obyektin daxilində yanar materialdan istifadə edilərək otaqlar
quraşdırılıb;
– obyektin ərazisi yanar tullantılardan təmizlənməyib və zirzəmi
sahəsində ehtiyat çıxış qapısının qarşına əlavə əşyalar
yığılıb;
– yanğın zamanı insanların təxliyəsi üçün köçürmə planı tərtib
olunmayıb;
– taxta konstruksiyalara odadavamlı məhlul hopdurulmayıb;
– obyektdə əmrlə yanğına qarşı rejim müəyyənləşdirilməyib;
– obyektin daşınmaz əmlakı “İcbari sığortalar haqqında”
Azərbaycan Respublikasının Qanununa uyğun sığorta olunmayıb.
Beləliklə, mövcud vəziyyət onu göstərir ki, obyektin
istismarının davam etdirilməsi nəticəsində orada hər an baş verə
biləcək yanğın qısa müddətdə genişlənərək faciəni qaçılmaz
edəcək.
Qeyd olunanları nəzərə alaraq, yanğın təhlükəsizliyi norma və
qaydalarının tələblərinin kobud pozulması faktları aşkar edilmiş
Bakı şəhəri, Nizami rayonu, Qara Qarayev prospekti, 39A ünvanında
yerləşən Qəribov Babək Allahverən oğluna məxsus işlənmiş
soyuducuların təmiri və satışı mağazasının fəaliyyətinin
dayandırılması barədə Qərar qəbul olunub və Qərarın bir nüsxəsi
obyektin nümayəndəsinə təqdim edilib.
