Bakı. Trend:
Ermənistan tərəfi avqustun 8-də Vaşinqtonda imzalanan sənəd
əsasında götürdüyü öhdəliklərə sadiq qalmalıdır. Əks halda, bu
istiqamətdə hər hansı manipulyasiya Ermənistanı daha da ağır
vəziyyətə salacaq. Azərbaycan Prezidenti İlham Əliyev Səudiyyə
Ərəbistanının “Əl-Ərəbiyyə” telekanalına müsahibəsində bu məqama
toxunaraq vurğuladı ki, Ermənistanın gələcək hökuməti Vaşinqtonda
imzalanan sənədi şübhə altına qoyarsa, ciddi çətinliklərlə
üzləşəcək.
Trend
xəbər verir ki, bunu Milli Məclisin deputatı Afət Həsənova
deyib.
Deputat bildirib ki, Azərbaycan regionda davamlı sülhün və
sabitliyin təmin olunması üçün üzərinə düşən bütün öhdəlikləri
məsuliyyətlə yerinə yetirir:
“Azərbaycan sülh gündəliyinin təşəbbüskarı olub. Sülh
müqaviləsinin imzalanması prosesi də məhz bizim ölkənin iradəsi ilə
gündəmə gətirilib. Lakin bu gün sənədin rəsmiləşməsinə mane olan
yeganə məsələ Ermənistan Konstitusiyasında hələ də mövcud olan,
Azərbaycanın ərazi bütövlüyünü şübhə altına alan müddəadır.
Bu dəyişiklik həyata keçirildikdən sonra sülh sazişinin
imzalanması reallaşacaq. Əgər Ermənistan verdiyi sözləri tutmasa və
sənədin şərtlərinə əməl etməsə, o zaman beynəlxalq aləmdə etibarsız
tərəfdaş kimi tanınacaq. Çünki Vaşinqton razılaşması yalnız ABŞ
deyil, Avropa İttifaqı, Türkiyə, ərəb ölkələri və digər beynəlxalq
tərəfdaşlar tərəfindən də dəstəklənib”.
Deputatın sözlərinə görə, sülh sazişi əslində Ermənistan üçün
daha həyati əhəmiyyət daşıyır:
“Hazırda dərin sosial-iqtisadi böhranla üz-üzə qalan
Ermənistanın vəziyyətdən çıxış yolu yalnız Azərbaycanla sülh sazişi
imzalamaqdan keçir. Əks halda, bu ölkə daha da ağır nəticələrlə
üzləşəcək. Ermənistanın bugünkü böhranlı durumunun əsas səbəbi
illərlə işğal siyasəti yürütməsi, Azərbaycan torpaqlarını işğal
saxlaması olub.
Vaşinqtonda imzalanmış sənəd isə beynəlxalq ictimaiyyət
tərəfindən müsbət qarşılanıb və onun pozulması təkcə Azərbaycana
yox, bütövlükdə dünya ictimaiyyətinə qarşı çıxmaq deməkdir. Buna
görə də Ermənistan öhdəliklərini tam şəkildə yerinə yetirməli,
destruktiv addımlardan çəkinməlidir. Əks halda, bu ölkənin
vəziyyəti daha da çətinləşəcək”.
