Bakı. Trend:
OpenAI 18 yaşdan kiçik istifadəçilər üçün ChatGPT chatbotunun
təhlükəsiz versiyasını hazırlayır.
Trend-in CNBC-yə
istinadən məlumatına görə, yeni modifikasiya valideyn nəzarəti
funksiyaları və uyğun olmayan məzmuna qarşı gücləndirilmiş müdafiə
mexanizmlərini əhatə edəcək.
Sistem yetkinlik yaşına çatmayan istifadəçiləri avtomatik olaraq
təhlükəsiz versiyaya yönləndirəcək, burada qrafik və cinsi məzmun
bloklanacaq. Şiddətli emosional sıxıntı hallarının qeydə alındığı
istisna hallarda isə hüquq-mühafizə orqanları cəlb oluna bilər.
OpenAI həmçinin istifadəçilərin yaşını daha dəqiq müəyyən etmək
üçün texnologiya üzərində işləyir. Əgər sistem istifadəçinin yaşını
etibarlı şəkildə müəyyən edə bilmirsə, defolt olaraq uşaq rejiminə
keçəcək.
Bu təşəbbüs ABŞ-ın Federal Ticarət Komissiyasının süni intellekt
chatbotlarının uşaqlar və yeniyetmələrə təsiri ilə bağlı
araşdırmasına cavabdır. Şirkət daha əvvəl ChatGPT ilə bağlı
yeniyetmənin təhlükəli vəziyyətə düşməsi və məhkəmə işlərinə səbəb
olan hadisələrdən sonra tənqid olunmuşdu.
