Bakı. Trend:
2008-2024-cü illərdə Azərbaycanda təsdiqlənmiş qeyri-suveren
əməliyyatların həcmi 2,6 milyar dollar təşkil edib.
Bu barədə Trend
Avrasiya İnkişaf Bankına istinadən xəbər verir.
Məlumata görə, əsas investorlar Avropa Yenidənqurma və İnkişaf
Bankı (848 milyon dollar), Asiya İnkişaf Bankı (791 milyon dollar),
Beynəlxalq Maliyyə Korporasiyası (209 milyon dollar), Asiya
İnfrastruktur İnvestisiya Bankıdır (170 milyon dollar). Prioritet
istiqamətlər energetika (714 milyon dollar) və maliyyə sektoru (517
milyon dollar) olub.
“Hesabata əsasən, Azərbaycanda orta illik maliyyələşdirmə həcmi
2,6 dəfə artaraq 2008–2010-cu illərdəki 108 milyon dollardan
2022–2024-cü illərdə 280 milyon dollara yüksəlib”.
AİB ekspertlərinin qeyd etdiyinə görə, Cənubi Qafqaz ölkələrində
(Azərbaycan, Ermənistan, Gürcüstan) beynəlxalq maliyyə
təşkilatlarının (BMT) təsdiqlədiyi qeyri-suveren maliyyələşdirmə
həcmi 2008–2024-cü illər ərzində 11,3 milyard dollar təşkil
edib.
“Hesabata görə, Cənubi Qafqaz ölkələrinin Avrasiya regionunda
BMT qeyri-suveren əməliyyatlarının ümumi həcmindəki payı
2008–2010-cu illərdəki 9 faizdən 2022–2024-cü illərdə 20 faizə
yüksəlib. Cənubi Qafqazda orta maliyyələşdirmə həcmi 0,4 milyard
dollardan 1,1 milyard dollara artıb. Maliyyələşdirmənin əsas
sahələri beynəlxalq maliyyə təşkilatlarının Mərkəzi Asiyadakı
prioritetlərinə uyğun olaraq energetika və maliyyə sektorudur.
Ümumilikdə BMT-lərin investisiya cəlbetmə dinamikası Mərkəzi
Asiyadakından aşağıdır. Bu isə, yəqin ki, regionların iqtisadi
miqyas fərqləri, daha az investisiya potensialı və Cənubi Qafqaz
ölkələrinin zəif regional bağlılığı ilə əlaqədardır”, – deyə
hesabatda qeyd olunur.
