Bakı. Trend:
Serbiya və Azərbaycanın Orta Dəhliz çərçivəsində əməkdaşlıq
imkanı var.
Trend xəbər verir
ki, bunu Serbiyanın daxili və xarici ticarət naziri Yaqoda
Lazareviç Bakıda keçirilən Birinci Beynəlxalq İnvestisiya Forumu
çərçivəsində jurnalistlərə verdiyi açıqlamada bildirib.
“Hər iki ölkə “Bir kəmər, bir yol” təşəbbüsündə fəal şəkildə
iştirak edirlər. Asiya və Uzaq Şərqi Avropa ilə birləşdirən yollar
hər birimiz üçün vacibdir. Serbiya və Azərbaycan üçün bu bütün
Asiyanı ehtiva edən, Azərbaycandan keçən və Serbiyanın yerləşdiyi
Avropaya aparan Orta Dəhliz çərçivəsində əməkdaşlıq qurmaq üçün
daha bir şansdır. Bu əla siyasi əlaqələri və iqtisadi əməkdaşlıq
səviyyəsi olan ölkələrimizi bir-birinə yaxınlaşdıran daha bir
önəmli faktordur.”, -deyə nazir bildirib.
Onun sözlərinə görə, ölkələrin iqtisadi , o cümlədən ticarət
sahəsində əməkdaşlığı üçün çoxlu istiqamətləri mövcuddur.
“Əlbəttə, biz müvafiq göstəricilərin artımını görmək istərdik.
Hazırda biz enerji sektorunda, kənd təsərrüfatında, yeni
texnologiyalarda və müdafiə sənayesində əməkdaşlıq edirik. Bununla
yanaşı, ticarət də artıq artım nümayiş etdirir. Əla siyasi
münasibətlər eyni dərəcədə inkişaf etmiş iqtisadi əməkdaşlıqla
tamamlanır. Doğrudan da, parlaq gələcəyimiz var və statistik
məlumatlar bunun sübutudur”,- deyə Lazareviç əlavə edib.
Qeyd edək ki, Orta Dəhliz regionun bir sıra ölkələrindən keçən,
Asiya ilə Avropanı birləşdirən nəqliyyat və ticarət marşrutudur.
Bu, ənənəvi Şimal və Cənub dəhlizlərinə alternativdir.
Marşrut Çindən başlayır və Qazaxıstan, Özbəkistan və
Türkmənistan kimi Mərkəzi Asiya ölkələrindən keçərək, Xəzər dənizi,
Azərbaycan, Gürcüstan və Türkiyədən keçərək Avropaya çatır. Orta
Dəhliz Asiyanın şərq bölgələrini, o cümlədən, Çini Avropa ilə
birləşdirən, daha uzun dəniz yollarından yan keçməklə quru yolu
təklif edir.
