İran, Azərbaycan və Rusiya elektrik mübadiləsi üzrə detallar üzərində işləyir

Bunu Trend-ə özəl müsahibəsində İranın
Azərbaycandakı səfiri Muctaba Dəmirçilu deyib.

Dəmirçilu bildirib ki, hazırda İran, Azərbaycan və Rusiyanın
elektrik şəbəkəsinin sinxronlaşdırılması istiqamətində detallar
üzərində işlənməkdədir. Üç ölkədə rəhbərlik səviyyəsində elektrik
mübadiləsinə razılıq var.

Səfir deyib ki, İranın “Monenko” şirkəti bu elektrik mübadiləsi
ilə əlaqədar tədqiqat işlərini başa çatdırıb və öz hesabatlarını
hazırlayaraq tərəflərə təqdim edib. Bu hesabatlar əsasında elektrik
şəbəkələrinin sinxronlaşdırılması imkanı var.

“Elektrik şəbəkələrinin sinxronlaşdırılması üç ölkənin elektrik
şəbəkəsinin təhlükəsizliyini artıra və 3-cü tərəfə elektrik
ixracını imkanını yarada bilər”, – deyə o qeyd edib.

Dəmirçilu əlavə edib ki, may ayında İranın Energetika
Nazirliyinin yüksək səviyyəli heyəti bununla əlaqədar Bakıya səfər
edib. Səfər çərçivəsində enerji sahəsində əməkdaşlıq yolları və
xüsusilə İran, Azərbaycan və Rusiya arasında elektrik şəbəkəsinin
sinxronlaşdırılması haqqında danışıqlar aparıb.