Bakı. Trend:
“Fitch Ratings” Agentliyi Azərbaycan İpoteka və Kredit Zəmanət
Fondunun emitent defoltunun uzunmüddətli reytinqlərini xarici və
milli valyutada “BBB-” səviyyəsində təsdiqləyib. Reytinqlər üzrə
proqnoz – “Sabit”dir.
Trend xəbər verir
ki, “Fitch”, Fondu dövlətlə sıx əlaqələri olan, Azərbaycanla
bağlılığı möhkəm olan və əlçatan mənzil təminatı sahəsində,
həmçinin kiçik və orta biznesin (KOB) maliyyələşməsinin
asanlaşdırılması yolu ilə biznesin inkişafına dəstək göstərilməsi
istiqamətində mühüm funksiyalar yerinə yetirən bir qurum kimi
qiymətləndirir. Buna görə, agentlik Fondun reytinqlərini
Azərbaycanın reytinqlərinə bərabər tutur. Fondun müstəqil kredit
profili müəyyən edilmir, çünki onun dövlət adından həyata keçirilən
missiyası, dövlətlə sıx əməliyyat və maliyyə əlaqələri, eləcə də
dövlət maliyyələşməsindən asılılığı müstəqil qiymətləndirməni
qeyri-informativ edir.
“Fitch” Azərbaycanın fövqəladə dəstək imkanını “demək olar ki,
təmin olunmuş” kimi qiymətləndirir. Bu, “dəstək göstərmək öhdəliyi”
və “dəstəyə maraq” amillərinin birləşməsini əks etdirir.
