Bakı. Trend:
Belçika son həftələr Ukraynaya qarşı həyata keçirilən
genişmiqyaslı Rusiya hücumlarını ən qəti və birmənalı şəkildə
pisləyir.
Trend xəbər verir ki, bunu
Belçikanın xarici işlər naziri Maksim Prevo “X” sosial media
hesabında yazıb.
“Belçika son həftələr Ukraynaya qarşı həyata keçirilən
genişmiqyaslı Rusiya hücumlarını ən qəti və birmənalı şəkildə
pisləyir.
Bu zərbələr dinc əhaliyə, yaşayış məhəllələrinə, xəstəxanalara,
enerji infrastrukturu və həyati vacib xidmətlərə qəsdən yönəldilib.
Nəticədə, o cümlədən uşaqlar olmaqla, günahsız insanlar həlak olub
və yaralanıb.
Biz həmçinin Rusiyanın Kiyevdə Azərbaycan səfirliyinə endirdiyi
zərbə ilə bağlı dərindən narahatıq. Diplomatik missiyaya hücum
təkcə yolverilməz deyil — bu, beynəlxalq sistemi qoruyub saxlayan
prinsiplərə birbaşa hücumdur. Belçika Azərbaycanı və bu
zorakılıqdan zərər çəkən bütün diplomatik heyəti qətiyyətlə
dəstəkləyir.
Ukrayna xalqına: siz tək deyilsiniz. Biz sizin yanınızdayıq.
Avropa və beynəlxalq tərəfdaşlarımızla birlikdə dəstəyi davam
etdirəcək və bu qanunsuz və mənəviyyatsız müharibə bitənə qədər
Rusiyaya təzyiqi artıracağıq”, — deyə Maksim Prevo bildirib.
