Bakı. Trend:
Beynəlxalq Maliyyə Korporasiyası artıq 30 ildir ki, Azərbaycanın
inkişafına dəstək olur.
Trend xəbər verir
ki, bunu IFC-nin Qərbi Balkanlar və Cənubi Qafqaz üzrə direktoru
Vibke Şlömer öz sosial şəbəkə hesabında yazıb.
V. Şlömer bildirib ki, IFC-nin Azərbaycanda fəaliyyətə başladığı
1995-ci ildən etibarən maliyyə xidmətləri, infrastruktur, sənaye
istehsalı və aqrobiznes sahələrində maliyyələşdirdiyi təxminən 60
layihə həyata keçirilib.
“Bizim məsləhətçi fəaliyyətimiz biznes mühitinin
gücləndirilməsinə, maliyyə sektorunun dəstəklənməsinə, korporativ
idarəetmənin yaxşılaşdırılmasına və kiçik və orta sahibkarlıq
subyektləri üçün imkanların genişləndirilməsinə kömək edib. Bu gün
Azərbaycandakı fəaliyyətimiz iqtisadi şaxələndirmənin
dəstəklənməsi, iş yerlərinin yaradılması, KOB-ların maliyyəyə
çıxışının genişləndirilməsi, enerji əlçatanlığının artırılması və
ölkənin regional nəqliyyat qovşağı kimi rolunu möhkəmləndirən
infrastrukturun inkişafına yönəlib. Bu fəaliyyət vacibdir, belə ki,
biznesin inkişafına, özəl investisiyaların stimullaşdırılmasına və
xüsusilə Azərbaycanın karbohidrogenlərdən kənar iqtisadiyyata
keçidi sürətləndirdiyi bir zamanda daha dayanıqlı və inklüziv
gələcəyin qurulmasına töhfə verir. Biz həmçinin region üzrə
yüklərin daşınmasında mühüm rol oynayan Bakı Beynəlxalq Dəniz
Ticarət Limanına da baş çəkdik”, – deyə o vurğulayıb.
Şlömer əlavə edib ki, Bakı səfəri çərçivəsində o, Nəqliyyat
Nazirliyi, Mərkəzi Bank və İqtisadiyyat Nazirliyinin nümayəndələri
ilə məhsuldar görüşlər keçirib və hər bir qurum mövcud islahatların
əhəmiyyətini və özəl sektorun inkişafı üçün imkanları önə
çəkib.
“Bank Respublika nümayəndələri ilə görüşüm də 2007–2009-cu
illərdə KOB-ların maliyyələşdirilməsi ilə başlayan və 2023–2024-cü
illərdə genişləndirilmiş uzunmüddətli tərəfdaşlığımızın
əhəmiyyətini bir daha təsdiqlədi. Bu əlaqələrin möhkəmləndirilməsi
prioritet olaraq qalır, çünki bank kiçik müəssisələrə və iqlim
yönümlü investisiyalara dəstəyini daha da artırır”, – deyə o
fikrini yekunlaşdırıb.
