Bakı. Trend
Cənubi Qafqazdakı sülh Avropa ilə Mərkəzi Asiya arasında
əlaqələrin gücləndirilməsi üçün mühüm əhəmiyyət kəsb edir.
Avropa İttifaqı Şurasının Prezidenti Antonio Koşta bu barədə
Trend-ə
açıqlamasında bildirib.
O, bu bəyanatı Qazaxıstan Prezidenti Kasım-Jomart Tokayev ilə
apardığı danışıqların nəticələrinə əsasən verib.
Koşta, Qazaxıstanın regional sabitliyin təmin edilməsində və
Ermənistan ilə Azərbaycan arasında münaqişənin həlli məsələsindəki
rolunu vurğulayıb.
“Sülh və inkişaf edən Cənubi Qafqaz, Avropa ilə Mərkəzi Asiya
arasında əlaqələrin gücləndirilməsi üçün həyati əhəmiyyət kəsb
edir,” – deyə Avropa İttifaqı Şurasının Prezidenti bildirib.
O, həmçinin artan qlobal gərginlik və münaqişələr fonunda,
beynəlxalq hüququn təhlükə altında olduğu bir şəraitdə,
əməkdaşlığın koordinasiyasının vacibliyini qeyd edib.
Koşta, Qazaxıstana BMT Nizamnaməsinin və beynəlxalq hüquq
prinsiplərinə əsaslanan beynəlxalq nizamın ardıcıl müdafiəsi üçün
dərin təşəkkürünü bildirib.
Onun sözlərinə görə, Avropa İttifaqı ilə Qazaxıstan arasında
əməkdaşlıq konkret nəticələr verir.
“Bu həftə Brüsseldə vizaların sadələşdirilməsi barədə razılaşma
üzrə danışıqlara başladıq. Mən yaxşı başa düşürəm ki, bu danışıqlar
həm Qazaxıstan vətəndaşları, həm də Avropa vətəndaşları üçün çox
vacibdir. Bu razılaşmanın imzalanmasından sonra vətəndaşlarımızın
bir-birini görməsi, təhsil alması, işləməsi və investisiya qoyması
asanlaşacaq – bu, bizim xalqlarımız arasında dostluğun əsl simvolu
olacaq,” – deyə o qeyd edib.
