Bakı. Trend:
Uzunmüddətli perspektivdə Azərbaycanın qaz hasilatını bir neçə
yeni apstrim layihəsi dəstəkləyə bilər.
Trend bu barədə
“S&P Global Ratings”ə istinadən xəbər verir.
“İqtisadi fəallıq ilin ikinci yarısında ötən ilin eyni dövrü ilə
müqayisədə 1,5 faiz artıb. Artım qeyri-neft sektorunun hesabına
təmin edilib, halbuki neft-qaz sektoru daha aşağı qiymətlər və
hasilatın azalması fonunda ümumi istehsala təzyiq göstərməyə davam
edib. İlin yekununda real ÜDM artımının 2024-cü ildəki 4,1 faizlə
müqayisədə 1,8 faizə qədər yavaşlayacağını gözləyirik. İlk 10 ayda
neft hasilatı 4,6 faiz azalaraq gündəlik təxminən 556 min barelə
düşüb ki, bu da ötən ilin eyni dövrü ilə müqayisədə təxminən günə
27 min barel azalma deməkdir. Təbii qaz hasilatı isə 1,7 faiz
artaraq neft ekvivalentində təxminən günə 849 min barelə çatıb,
yəni cəmi günə 14 min barel artım olub. Bu isə göstərir ki, qaz
hasilatındakı mülayim artım neft hasilatındakı daha kəskin
azalmaları kompensasiya etmir. Nəticədə neft-qaz sektorundakı ümumi
aktivlik mənfi olaraq qalır”,- deyə agentlik qeyd edir.
“S&P” analitiklərinin qiymətləndirməsinə görə, belə dinamika
davam edəcək. Neft hasilatı, böyük ehtimalla “Azəri-Çıraq-Günəşli”
(AÇG) yatağının daha da tükənməsi fonunda 2026-cı ildə də orta
səviyyədə azalmaqda davam edəcək.
“Xarici operatorların əlavə investisiyaları hasilatın baza
azalmasını ləngidir, lakin dayandırmır. Qaz hasilatı isə ümumilikdə
sabit qalacaq, çünki Azərbaycan orta müddətli pik həddə yaxın
fəaliyyət göstərir və əhəmiyyətli yeni həcmlərin dövrün sonuna
qədər daxil olması gözlənilmir. Neft-qaz sektorunun iqtisadi artıma
zəif töhfəsi və şaxələndirmə prosesinin tədrici irəliləyişini
nəzərə alaraq, real ÜDM artımının 2026-cı ildə təxminən 1,7 faiz
səviyyəsində sabit qalacağını və yaxın bir neçə il ərzində də
nisbətən zəif olacağını proqnozlaşdırırıq. Daha uzunmüddətli
perspektivdə isə bir sıra apstrim layihələri (“Abşeron” yatağının
növbəti işlənmə mərhələsi, AÇG-nin “dərin qaz” layihəsi, eləcə də
Ümid, Babək və Qarabağ yataqlarının işlənməsi) qaz hasilatının
həcmlərini dəstəkləyə bilər, lakin bu layihələrin hamısı
planlaşdırmanın erkən mərhələsindədir və həyata keçirilməsi bir
neçə il tələb edəcək”, — agentliyin hesabatında bildirilir.
