Bakı. Trend:
Gürcüstan Dəmir Yollarının genişmiqyaslı modernləşdirmə layihəsi
dəmir yollarının tutumunu əhəmiyyətli dərəcədə artırıb, istismar
xərclərini azaldıb, təhlükəsizliyi gücləndirib və sərnişinlərin
rahatlığını yaxşılaşdırıb.
Trend xəbər verir ki, bu
sözləri Gürcüstanın Baş naziri İrakli Kobaxidze Gürcüstan Dəmir
Yollarının modernləşdirmə layihəsinin başa çatmasına həsr olunmuş
tədbirdə çıxışı zamanı söyləyib.
O bildirib ki, bu, sadəcə infrastrukturun modernləşdirilməsi
deyil, Gürcüstanın öz gələcəyini, iqtisadi gücünü və qlobal
proseslərdə layiqli yerini təmin etmək üçün etdiyi açıq siyasi və
strateji seçimdir.
Hökumət başçısının sözlərinə görə, Gürcüstan Dəmir Yolları bu
gün 21-ci əsrin çağırışlarına, texnoloji standartlara və qlobal
ticarətin yeni reallığına cavab olaraq yeni bir mərhələyə qədəm
qoyur.
“Dəmir yolu həmişə Gürcüstanın dövlətçiliyinin, iqtisadiyyatının
və əlaqəsinin mühüm sütunu olub. 1872-ci ildə qurulan Gürcüstan
Dəmir Yolları bu gün, 153 ildən sonra, yeni bir mərhələyə – 21-ci
əsrin çağırışlarına, texnoloji standartlara və qlobal ticarətin
yeni reallığına cavab verən bir mərhələyə qədəm qoyur”, – deyə Baş
nazir vurğulayıb.
Hökumət başçısının sözlərinə görə, layihə çərçivəsində yeni
körpülər və tunellər, 100-dən çox mühəndislik qurğusu, təxminən 100
kilometr uzunluğunda yeni yollar tikilib, beynəlxalq standartlara
uyğun təhlükəsizlik sistemləri quraşdırılıb.
