Bakı. Trend:
Wolt, xidmət dəyişikliyini və onun klassik yemək
çatdırılmasından kənara çıxaraq inkişafını əks etdirən ən
böyük tətbiq yeniləməsinin istifadəyə verildiyini elan
edib. Bu yeniləmə şirkətin qlobal strategiyasının bir hissəsidir və
müxtəlif məhsul və xidmət kateqoriyalarını vahid rəqəmsal məkanda
birləşdirən lokal kommersiya platformasının
formalaşdırılmasına yönəlib.
Azərbaycanda yenilənmiş Wolt tətbiqi restoranları, ərzaq
mağazalarını, aptekləri, gözəllik məhsullarını və pərakəndə satış
mağazalarını bir platformada birləşdirərək xidməti gündəlik şəhər
ehtiyaclarının həlli üçün alətə çevirir. Beləliklə, Wolt əsasən
restoranlardan çatdırılmaya fokuslanan modeldən tədricən
lokal alış-veriş və xidmətlər ekosisteminə doğru
keçid edir.
Yeniləmənin əsas dəyişikliklərindən biri axtarış və
naviqasiya məntiqinin yenilənməsi olub. Artıq istifadəçi
yolu konkret bir müəssisənin seçilməsindən deyil, lazım olan məhsul
və ya kateqoriya üzrə axtarışdan başlayır. Bu isə yemək, ərzaq,
məişət malları, kosmetika və ya elektronika olsun, uyğun təklifləri
daha sürətli tapmağa və onları vahid interfeys daxilində
müqayisə etməyə imkan yaradır.
Yeniləmənin əsasını bütün yaxınlıqdakı restoran və mağazalara
giriş nöqtəsi rolunu oynayan vahid axtarış mərkəzi
təşkil edir. Tətbiqdə axtarış istifadəçi niyyətləri nəzərə alınaraq
yenidən qurulub: sistem sorğunu təhlil edir və müxtəlif kateqoriya
və satıcılardan olan nəticələri qruplaşdırılmış şəkildə təqdim
edir. İlk dəfə olaraq istifadəçilər ayrıca müəssisələrin
səhifələrinə keçmədən, konkret məhsul və yeməkləri birbaşa
axtarış mərhələsində görə bilirlər.
Assortimentə baxış məntiqi də dəyişib. İndi istifadəçilər seçimi
konkret məhsuldan başlayaraq müxtəlif satıcıların təkliflərini
müqayisə edə bilirlər ki, bu da qərarvermə prosesini asanlaşdırır
və sifarişə gedən yolu qısaldır. Yeniləmələr tətbiqin vizual
hissəsinə də təsir edib — interfeys daha müasir olub, naviqasiya
daha sürətli, tətbiqlə qarşılıqlı əlaqə isə daha axıcı və ardıcıl
hala gəlib.
Şirkət bildirir ki, bu yeniləmə Wolt-un uzunmüddətli inkişaf
strategiyasını əks etdirir. Artıq bu gün sifarişlərin əhəmiyyətli
bir hissəsi restoranlardan kənar kateqoriyalara aiddir və tətbiqin
yeni görünüşü lokal bazarda məhsul çeşidinin və partnyor
şəbəkəsinin daha da genişlənməsi üçün zəmin yaradır.
“Azərbaycanda istifadəçi vərdişlərinin necə dəyişdiyini görürük:
getdikcə daha çox insan Wolt-dan təkcə yemək sifarişi üçün deyil,
gündəlik alış-veriş üçün də istifadə edir. Bu yeniləmə xidməti həm
istifadəçilər, həm də lokal bizneslər üçün daha rahat və məntiqli
edir, onların rəqəmsal mühitdə daha görünən və əlçatan olmasına
kömək edir”, – deyə Wolt Azərbaycanın baş
direktoru Tofiq Süleymanov bildirib.
Yenilənmiş Wolt tətbiqi artıq Azərbaycandakı istifadəçilər üçün
əlçatandır.
