Bakı. Trend:
Kinematoqrafiya sahəsində bir sıra yeni anlayışlar
müəyyənləşdiriləcək.
Trend-in
məlumatına görə, bu məsələ Milli Məclisin bugünkü plenar iclasında
müzakirə olunan “Kinematoqrafiya haqqında” Qanunda dəyişiklik
edilməsi barədə qanun layihəsində öz əksini tapıb.
Bildirilib ki, aşağıdakı yeni anlayışların qanuna əlavə edilməsi
hüquqi qeyri-müəyyənliyi aradan qaldıracaq, normanın tətbiqində
vahid yanaşmanı təmin edəcək:
- milli film – xarici film hesab
edilməyən və bu qanunda göstərilən tələblərə cavab verən film; - xarici film – bütövlükdə xarici
prodüser (prodüserlər) tərəfindən istehsal edilən film; - birgə istehsal filmi – yerli və
xarici prodüserlərin birgə istehsal etdikləri və milli film hesab
edilməyən film; - film istehsalı – film çəkilişinə
hazırlıq, film çəkilişi və film çəkilişinin tamamlanması
mərhələlərini özündə əhatə edən proses; - film çəkilişinə hazırlıq – filmin
ideyasının yaranması, konsepsiyasının hazırlanması, ssenarisinin
yazılması və film çəkilişi məqsədilə digər inzibati və texniki
məsələlərin həlli ilə əlaqədar işləri əhatə edən proses; - film çəkilişi – filmin bilavasitə
kinolentə və ya digər daşıyıcıya çəkilişini təmin edən
fəaliyyətləri əhatə edən proses; - filmin çəkilişinin tamamlanması –
çəkilmiş kadrların redaktəsini, filmin vizual, səs və rəng
işləmələrini, effekt, titr və qrafik tərtibatını əhatə edən
proses; - yerli prodüser – Azərbaycan
Respublikasının vətəndaşı və ya qanunla müəyyən olunmuş qaydada
Azərbaycan Respublikasında dövlət qeydiyyatından keçmiş hüquqi şəxs
olan prodüser; - xarici prodüser – əcnəbi və ya
vətəndaşlığı olmayan şəxs və ya xarici hüquqi şəxs olan
prodüser;
Qanun layihəsi müzakirələrdən sonra səsverməyə çıxarılaraq
birinci oxunuşda qəbul edilib.
