Bakı. Trend:
Beynəlxalq alimlər qrupu “IRAS 07251-0248” – yaxın ultra-parlaq
infraqırmızı qalaktika dərin şəkildə gizlənmiş nüvəsində kiçik üzvi
molekulların qeyri-adi dərəcədə yüksək konsentrasiyasını aşkar
edib.
Trend xəbər verir
ki, bu barədə tədqiqatın nəticələri “Nature Astronomy” jurnalında
dərc olunub.
“IRAS 07251-0248” ultra-parlaq infraqırmızı qalaktikalar sinfinə
aiddir: onun mərkəzi sıx qaz və toz qatları ilə demək olar ki,
tamamilə örtülüb. Adi teleskoplar nüvənin daxilinə “baxa” bilmir,
lakin infraqırmızı şüalanma toz pərdələrindən keçə bilir. Məhz bu
xüsusiyyət “James Webb Space Telescope”ə nüvənin kimyəvi tərkibini
araşdırmağa imkan verib.
Alimlər 3-28 mikron diapazonunda “NIRSpec” və “MIRI”
cihazlarının spektroskopik məlumatlarından istifadə ediblər. Bu,
həm qaz halında olan molekulların, həm də donmuş buzların və toz
hissəciklərinin “kimyəvi izlərini” müəyyən etməyə, eləcə də onların
temperaturunu və konsentrasiyasını qiymətləndirməyə şərait
yaradıb.
Qalaktikanın mərkəzində geniş spektrli kiçik üzvi birləşmələr
aşkar edilib: benzol (C₆H₆), metan (CH₄), asetilen (C₂H₂),
diasetilen (C₄H₂), triasetilen (C₆H₂). Bundan əlavə, Süd Yolundan
kənarda ilk dəfə olaraq metil radikalı (CH₃) qeydə alınıb. Həmçinin
əhəmiyyətli miqdarda karbonlu toz dənəcikləri və su buzu müəyyən
edilib.
