Vaşinqton. Trend6
Azərbaycan Dövlət Neft Şirkəti (SOCAR) Honeywell ilə tərəfdaşlıq
çərçivəsində rəqəmsal transformasiya və avtomatlaşdırma
təşəbbüslərini inkişaf etdirir.
Trend-in xüsusi müxbiri xəbər
verir ki, bunu bu gün Vaşinqtonda ABŞ-Azərbaycan Ticarət
Palatasının 30 illiyinə həsr olunmuş ABŞ-Azərbaycan Ticarət və
Biznes Konfransında “Techforward: Texnologiyalar Böyüməni Təkan
Verir” mövzusunda panel müzakirəsi zamanı Honeywell şirkətinin
Sənaye Avtomatlaşdırma Həlləri üzrə vitse-prezidenti və baş
meneceri Vişal Mehta bildirib.
“Honeywell şirkəti Azərbaycanla qırx ildir ki, əməkdaşlıq edir.
Bakıdakı ilk ofisimiz 2005-ci ildə açılıb. Bu müddət ərzində neft
emalı, kimya və bina idarəetməsi sənayesi üçün avtomatlaşdırma və
proqram təminatı həlləri təqdim etmişik”, – Mehta qeyd edib.
O, Honeywell-in SOCAR ilə rəqəmsal transformasiya və
avtomatlaşdırmaya yönəlmiş əhəmiyyətli bir tərəfdaşlıq inkişaf
etdirdiyini və SOCAR-ın bir çox neft emalı zavodlarının artıq
Honeywell texnologiyaları ilə fəaliyyət göstərdiyini
vurğulayıb.
“Beş illik tərəfdaşlığın bir hissəsi olaraq, SOCAR-ın mövcud
yataqlarında və istismara verilən yeni aktivlərində rəqəmsal
transformasiya təşəbbüslərini həyata keçiririk. Buraya aktivlərin
performansının idarə edilməsi, operator təlim simulyatorları və
rəqəmsal əkizlər — hamısı enerji sektoru üçün yüksək texnologiyalı
həllər daxildir. Biz həmçinin Azərbaycanın Rəqəmsal 2030 proqramını
və aşağı karbonlu enerji, təbii qazın optimallaşdırılması və karbon
tutma texnologiyaları da daxil olmaqla davamlı inkişaf məqsədlərini
dəstəkləyirik”, – Mehta əlavə edib.
O, həmçinin insan kapitalının vacibliyini vurğulayıb.
“Mühəndislərin və operatorların ənənəvi bacarıqlarına əlavə
olaraq, personalı məlumatlar, rəqəmsal texnologiyalar və süni
intellektlə təhlükəsiz və effektiv şəkildə işləmək üçün öyrətmək
vacibdir. Bu, texnologiya investisiyalarının maksimum təsir
göstərməsini təmin etmək üçün vacibdir”, – o bildirib.
