Bakı. Trend:
Bu ilin yanvar ayında Azərbaycandan İtaliyaya 312,3 milyon ABŞ
dolları dəyərində 801,4 milyon kubmetr təbii qaz (qaz halında)
ixrac edilib.
Trend bu
barədə Azərbaycanın Dövlət Statistika Komitəsinə istinadən xəbər
verir.
Məlumata görə, ötən ilin eyni dövrü ilə müqayisədə bu göstərici
məbləğ ifadəsində 145,2 milyon dollar və ya 31,7%, həcminə görə isə
89,9 milyon kubmetr və ya 10,1% azalıb.
Qeyd edək ki, 2026-cı ilin yanvar ayında Azərbaycandan xaricə
ümumilikdə 687,5 milyon ABŞ dolları dəyərində 2,292 milyard kubmetr
təbii qaz ixrac edilib. Bu, ötən ilin eyni dövründəki göstərici ilə
müqayisədə dəyər ifadəsində 182,6 milyon ABŞ dolları və ya 21%,
həcm baxımından isə 46,9 milyon kubmetr və ya 2% azdır.
Eyni zamanda bu ilin yanvar ayında cəmisi bir ölkədən – İran
İslam Respublikasından Azərbaycana 2,9 milyon ABŞ dolları dəyərində
43,5 milyon kubmetr təbii qaz idxal edilib. Ötən ilin eyni dövründə
isə yalnız Türkmənistandan Azərbaycana 6,4 milyon ABŞ dolları
dəyərində 42,6 milyon kubmetr təbii qaz idxalı qeydə alınıb.
Beləliklə, illik müqayisədə Azərbaycana təbii qaz idxalı dəyər
ifadəsində 3,5 milyon ABŞ dolları və yaxud 2,2 dəfə azalıb, həcm
baxımından isə 894 min kubmetr və ya 2,1% artıb.
