Bakı. Trend:
İraqın Ənbər vilayətində yerləşən hərbi obyektlərə endirilən
zərbələr nəticəsində İraq Silahlı Qüvvələrinin yeddi hərbi
qulluqçusu həyatını itirib, daha 13 nəfər isə yaralanıb.
Trend xarici KİV-ə
istinadən xəbər verir ki, bu barədə ölkənin Müdafiə Nazirliyi
məlumat yayıb.
Nazirliyin məlumatına əsasən, hava hücumuna İraq Müdafiə
Nazirliyinin tabeliyində olan Əl-Habbaniyə hərbi hospitalı, eləcə
də Əl-Habbaniyə istehsalat idarəsinin binası məruz qalıb.
İraqın Müdafiə Nazirliyi hava zərbələrini pisləyərək, bunun
tibbi müəssisələrin və personala hücumları qadağan edib beynəlxalq
hüquq və normaların kobud və ciddi pozuntusu olduğunu bildirib.
Qeyd edək ki, ABŞ və İran arasında nüvə proqramı ilə bağlı
danışıqlarda konkret razılaşma əldə olunmadığına görə, 28 fevraldan
etibarən ABŞ və İsrail İrana hərbi hava hücumlarına başlayıb. Buna
cavab olaraq İran da həmin gündən etibarən İsrailə və ABŞ-nin
region ölkələrindəki hərbi obyektlərinə raket və dronlarla hücum
edib.
İrana hərbi hava hücumlarının ilk günündə İranın Ali Lideri
Ayətullah Seyid Əli Xamenei, bir sıra yüksək vəzifəli hərbçilər
ölüb. 8 martda İranın Ekspertlər Məclisi səsçoxluğu ilə Ayətullah
Seyid Əli Xameneinin oğlu Seyid Muctaba Xameneini İranın 3-cü Ali
Lideri seçib.
İrana hərbi hava hücumları nəticəsində İran Ordusunun Baş
Qərargah rəisi general-mayor Əbdülrəhim Musəvi, İslam İnqilabı
Keşikçilər Korpusunun (SEPAH) baş komandanı Məhəmməd Pakpur, Ali
Liderinin müşaviri və Müdafiə Şurasının katibi Əli Şəmxani, müdafiə
naziri Əziz Nəsirzadə, kəşfiyyat naziri İsmayıl Xətib, Ali Milli
Təhlükəsizlik Şurasının katibi Əli Laricani, Bəsic Təşkilatının
komandiri Qulamreza Süleymani və başqaları hərbi hava hücumları
zamanı ölüblər.
1-5 mart tarixlərində qarşıdurma daha da genişlənərək Yaxın
Şərqin müxtəlif ölkələrini əhatə edib.
Münaqişə nəticəsində regionun enerji infrastrukturu və dəniz
nəqliyyatı da ciddi risk altına düşüb. Hörmüz boğazı ətrafında
təhlükəsizlik gərginliyi səbəbindən dünya bazarında neft qiymətləri
kəskin artıb və bir sıra ölkələr vətəndaşlarını regionu tərk etməyə
çağırıb.
