Avropa İttifaqı (Aİ) Qarabağda 44 günlük müharibənin başa çatmasının ikinci ili münasibəti ilə bəyanat yayıb.
Oxu.Az-ın məlumatına görə, sənəd Aİ-nin rəsmi saytında yayımlanıb.
Bəyanatda Aİ-nin tərəfləri düşmənçilik səhifəsini çevirməyə dəvət etdiyi vurğulanıb:
“Bu çətin irsi tam dərk edərək, hər iki tərəfi düşmənçilik səhifəsini çevirməyə, daha çox insan itkisi və zərərlərin qarşısını almaq üçün barışıq səylərini davam etdirməyə çağırırıq”.
Mətbuat Xidmətindən bildirilib ki, Aİ Azərbaycan və Ermənistan rəhbərliyinin fikir ayrılıqlarını aradan qaldırmaq və regionda davamlı və dayanıqlı sülhə nail olmaq üçün atdıqları çoxsaylı addımları alqışlayır:
“Aİ onların müxtəlif səviyyələrdə və müxtəlif formatlarda davam edən danışıqlarda dayanıqlı iştirakını yüksək qiymətləndirir. Bu danışıqların çətin olduğu və vaxt tələb edəcəyi aydın olsa da, nəbzi qorumaq, irəliyə doğru konkret addımlar barədə razılığa gəlmək və regionda bütün əhalinin rifahı üçün təhlükəsiz və firavan mühiti təmin etmək çox vacibdir”.
Bəyanatda o da vurğulanıb ki, Avropa İttifaqı Aİ Şurasının Prezidenti Şarl Mişelin şəxsi səyləri, Aİ-nin Ali Nümayəndəsi Jozep Borrel, Aİ-nin xüsusi nümayəndəsi Toivo Klaar və Aİ-nin digər mexanizmlərinin iştirakı da daxil olmaqla, hər iki tərəfin istəyinə cavab verərək öz fəaliyyətini davam etdirəcək, həmçinin qalan bütün məsələlərin hərtərəfli və ədalətli həlli istiqamətində tərəflərə dəstək olacaq.
Mənbə: Eeas.europa.eu
www.102info.az
