Göygöl rayonunda baş verən sel daşqınları zamanı 950-dən artıq evin qaz təminatı dayandırılmışdı”.
Bunu SOCAR-ın “Azəriqaz” İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev Oxu.Az-ın sorğusuna cavab olaraq bildirib.
O qeyd edib ki, daşqınlar rayonda dörd kəndə ciddi ziyan vurub:
“950-dən artıq evin qaz təminatı dayandırılmışdı. Yağış dayanan zaman bərpa işləri aparılıb. Artıq 700-ə yaxın evin qaz təminatı bərpa olunub. 250 evin də qaz təminatının bərpa olunması üçün işlər aparır”.
İlhamə Əbülfət
10:20
Ötən gün axşam saatlarında yağan güclü leysan yağışları nəticəsində Göygöl rayonunun Aşağı Zurnabad, Şəhriyar, Kərəmli və Topalhəsənli kəndlərindən sel keçib.
Göygöl Rayon İcra Hakimiyyətinin rayon Fövqəladə Hallar Komissiyasından “Report”un Qərb bürosuna bildirilib ki, sel həmin kəndlərə ciddi zərər vurub.
Qeyd edilib ki, sel nəticəsində, əsasən, avtomobil yoluna, qaz xətlərinə, elektrik və rabitə təsərrüfatına, həmçinin vətəndaşlara məxsus əkin və həyətyanı sahələrə zərər dəyib.
Bildirilib ki, aidiyyəti qurumların, idarələrin əməkdaşları və texnikalar dərhal hadisə yerinə cəlb olunub, fəsadların aradan qaldırılması istiqamətində işlərə başlanılıb.
Vurğulanıb ki, hazırda hər dörd kənddə qazın və elektrik enerjisinin verilməsi qismən bərpa olunub. Eləcə də bu kəndləri birləşdirən avtomobil yolu təmizlənib və hərəkət bərpa edilib:
“Kənddaxili yollarda isə ciddi fəsadlar olmayıb. Son məlumata görə, vətəndaşlara məxsus müxtəlif markalı beş avtomobilə zərər dəyib, obyektlərə və evlərə isə qismən ziyan dəyib. Hazırda komissiyanın əməkdaşları tərəfindən araşdırmalar aparılır, dəymiş ziyanlar hesablanır”.
Xatırladaq ki, təbii fəlakət nəticəsində 1954-cü il təvəllüdlü Muxtar Hüseynov və 2001-ci il təvəllüdlü İbrahim Qurbanov selə düşərək həlak olublar.
www.102info.az
