Milli Olimpiya Komitəsinin (MOK) inzibati binasında Avropa Atletika Assosiasiyasının prezidenti Dobromir Karamarinovla görüş keçirilib.
Bu barədə Oxu.Az-a Milli Olimpiya Komitəsinin Mətbuat Xidmətindən məlumat verilib.
Bildirilib ki, görüşdə MOK-un vitse prezidenti Çingiz Hüseynzadə, baş katib Azər Əliyev, Avropa Atletika Assosiasiyasının prezidenti Dobromir Karamarinov, Azərbaycan Atletika Fedeasiyasının prezidenti Cavid Qurbanov, MOK-un İcraiyyə Komitəsinin üzvü, Azərbaycan Atletika Federasiyasının birinci vitse-prezidenti, millət vəkili Könül Nurullayeva, MOK-un İdman İdarəsinin müdiri Həsənağa Rzayev və Ateltika Federasiyasının baş katibi Məhərrəm Sultanzadə iştirak edib.
Görüşdə Milli Olimpiya Komitəsinin vitse-prezidenti Çingiz Hüseynzadə MOK-un beynəlxalq idman əlaqələrindən danışaraq bu əlaqələrin hər zaman yüksək səviyyədə olduğunu bildirib. O, Azərbaycan Prezidenti, Milli Olimpiya Komitəsinin prezidenti İlham Əliyevin çıxışlarında ölkə rəhbərliyinə Milli Olimpiya Komitəsinin prezidentliyindən gəldiyini xüsusilə vurğuladığını deyib. Daha sonra ölkəmizin I Avropa Oyunlarına və IV İslam Həmrəyliyi Oyunlarına uğurla ev sahibliyi etməsindən danışaraq qeyd edib ki, Azərbaycan bu oyunlarda yeni standarları müəyyənləşdirib.
Çingiz Hüseynzadə bu gün Bakıda Avropa Ədalətli Oyunlar Hərəkatının (AƏOH) Konqresinin keçirildiyini və bu tədbirdə Avropa Ədalətli Oyunlar Hərəkatı ilə bağlı mükafatların verildiyini, ölkəmizdə atletikanın inkişafı ilə bağlı fikirlərini diqqətə çatdırıb: “Azərbaycanda Atletika Federasiyasının 100 illiyi qeyd olunacaq. Atletika ölkəmizdə bütün idam növlərinin inkişafında xüsusi yer tutur. Təsadüfi deyil ki, Paris-2024 Yay Olimpiya Oyunlarına ilk lisenziyanı məhz atletimiz Anna Skidan qazanıb. İstər Olimpiya, istərsə də Avropa Oyunlarında atletika yarışları bir qayda olaraq əsas yarışlardan hesab olunur”.
Çingiz Hüseynzadə daha sonra bildirib ki, Azərbaycan Atletika Federasiyasının prezidenti Cavid Qurbanovun idman sahəsində böyük təcrübəsi var. O, bundan əvvəl Azərbaycan Voleybol Federasiyasının da prezidenti olub və rəhbərlik etdiyi federasiya böyük uğurlar qazanıb.
Avropa Atletika Assosiasiyasının prezidenti Dobromir Karamarinov Azərbaycana səfərindən məmnun olduğunu və burada özünü doğma evindəki kimi hiss etdiyini bildirib. Qonaq MOK-da keçirilən bu görüşə görə minnətdarlıq edərək deyib ki, Azərbaycan Atletika Federasiyasının 100 illik yubileyi böyük idman hadisəsidir. O, Azərbaycan atletikanın inkişafı üçün Avropa Atletika Assosiasiyası öz dəstəyini bundan sonra da əsirgəməyəcəyini deyib. Dobromir Karamarinov Respublika Olimpiya Mərkəzi ilə tanışlığı barəsində də danışaraq ölkədə atletika idman növünün inkişafı üçün daha böyük və müasir mərkəzə ehtiyac duyulduğunu, rəhbərlik etdiyi qurumun bu sahədə yerli federasiyaya lazımi kömək göstərməyə hazır olduğunu vurğulayıb. O, Azərbaycan Atletika Federasiyasının Avropa Atletika Assosiasiyasının bir hissəsi olduğunu qeyd edərək, əmin olduğunu bildirib ki, bu idman növü ölkəmizdə daha da inkişaf edəcək və gələcəkdə də böyük uğurlar əldə olunacaqdır.
Azərbaycan Atletika Federasiyasının prezidenti Cavid Qurbanov Azərbaycan Voleybol Federasiyasındakı fəaliyyətindən danışaraq, qeyd edib ki, ölkəmizdə atletikanın inkişafı ilə bağlı əlindən gələni əsirgəməyəcək. Bu istiqamətdə Azərbaycan Gənclər və İdman Nazirliyi, Milli Olimpiya Komitəsi və Avropa Atletika Assosiasiyasının da federasiyaya kömək edəcəyinə ümidvar olduğunu bildirib. Federasiya prezidenti Respublika Olimpiya Mərkəzindəki şərait barədə danışaraq orada yerləşən ictimai iaşə obyektinin yenidən qurulacağını və idmançılar üçün zəruri qidalarla təmin olunacağını vurğulayıb.
Görüşün sonunda MOK-un vitse-prezidenti Çingiz Hüseynzadə Avropa Atletika Assosiasiyasının prezidenti Dobromir Karamarinova xüsusi xatirə hədiyəsi təqdim edib.
www.RIA24.az
