Böyük Britaniyanın xarici işlər naziri Liz Trass bildirib ki, Rusiyaya qarşı beynəlxalq sanksiyalar yalnız onun bütün qoşunları Ukraynanı tərk etdikdən sonra ləğv edilməlidir.
Bu barədə G7 (Böyük Yeddilik) dövlətlərinin xarici işlər nazirlərinin görüşündə danışan Liz Trass həmçinin vurğulayıb ki, müttəfiqlər Ukraynanın müqavimətini dəstəkləmək üçün “daha da sürətlə” getməlidirlər.
Onun sözlərinə görə, gələcəkdə baş verə biləcək növbəti təcavüz hallarının qarşısını almaq üçün Rusiya Prezidenti Vladimir Putin məğlubiyyətlə üzləşməlidir.
Trass Almaniyada keçirilən görüşdə həmkarlarını Rusiya qoşunları Ukraynada qaldığı müddətdə növbəti sanksiyalar dalğasına sadiq qalmağa çağırıb:
“Putin dünya səhnəsində özünü alçaldır. Biz Ukraynada ona heç bir xeyir gətirməyən və nəticədə gələcək təcavüzü məhdudlaşdıran məğlubiyyətlə üzləşməsini təmin etməliyik”.
Trass Ukraynanın müdafiəsinə dəstəyin, o cümlədən NATO hərbi alyansı tərəfindən istifadə edilən hərbi texnikaya çıxış imkanlarının artırılması barədə çağırışlarını təkrarlayıb.
Ukrayna və Moldova xarici işlər nazirlərinin cümə günü Almaniyada keçiriləcək başqa bir toplantıda G7 nazirlərinə qatılacaqları gözlənilir.
Mənbə: BBC
