Futzal üzrə Azərbaycan millisinin sabiq üzvü Serjao Kanadanın yeniyetmə futzalçılardan ibarət millisinə məşqçi təyin oluna bilər.
Bu barədə Oxu.Az-a bu ilin əvvəlindən Kanadanın yeniyetmə futzal millisinin baş məşqçisi işləyən Elnur Qəmbərov məlumat verib:
“Əslində mən yaşadığım Toronto şəhərində futzal akademiyası açmaq istəyirəm. Onu da bura o məqsədlə gətirmişəm. Ancaq federasiyaya da bildirmişəm ki, bu şəxs mənə millidə kömək ola bilər. Böyük ehtimalla, o mənim köməkçilərimdən biri olacaq”.
Qeyd edək ki, əsl adı Serjio Luis Masiel Lukas olan 42 yaşlı Serjao 2008-2010-cu illərdə “Araz Naxçıvan” klubunda çıxış edib.
Həmçinin, o, Azərbaycan millisində 43 oyun keçirib və 12 qol vurub. Braziliyalı 2010-cu ildə Azərbaycan millisinin Avropa çempionatında dördüncü yeri tutmasında əsas pay sahiblərindən biri olub.
Səbuhi Musa
www.RIA24.az
