Mikro və kiçik sahibkarların məhsullarının tanıdılmasına və satış imkanlarının genişləndirilməsinə dövlət dəstəyi davam etdirilir.
Kiçik və Orta Biznesin İnkişafı Agentliyinin (KOBİA) təmin etdiyi dəstəklə daha 16 KOB subyetki “Baku Crystal Hall”da keçirilən “Partners and Business Baku 2022” – yerli şirkətlərin tanıtım sərgisində məhsul və xidmətlərini geniş istehlakçı auditoriyasına təqdim edir. KOBİA-nın xüsusi stendində Agentliyin sərgilərə çıxışa dəstək mexanizmi çərçivəsində KOB-ların sənaye, qida, inşaat və digər sahələrdə məhsul və xidmətləri sərgilənir.
Hazırda KOBİA KOB-ların satış imkanlarının genişləndirilməsinə və yerli məhsulların tanıdılmasına dəstək məqsədilə ödənişsiz olaraq KOB-ların yerli və xarici ölkələrdə keçirilən sərgilərdə iştirakına, ticarət şəbəkələrinə çıxışına dəstək göstərir. KOB-lar kobmarket.az onlayn ticarət portalının imkanlarından da istifadə edə bilərlər.
Qeyd edək ki, “Partners and Business Baku 2022” – yerli şirkətlərin tanıtım sərgisi Kiçik və Orta Biznesin İnkişafı Agentliyi (KOBİA), Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi, Azərbaycan Sahibkarlar (İşəgötürənlər) Təşkilatları Milli Konfederasiyası və “Marsol” MMC-nin birgə təşkilatçılığı, “Kapital Bank”ın tərəfdaşlığı ilə keçirilir. Sərgidə sənaye, kənd təsərrüfatı, qida, İKT, təhsil, inşaat, logistika, tekstil və digər sahələrdə fəaliyyət göstərən 200-ə yaxın yerli şirkətin məhsul və xidmətləri təqdim olunur. Sərgi iyunun 18-dək davam edəcək.
www.RIA24.az
