“Biz bu uzunmüddətli müharibənin səbəb olduğu insan itkilərindən sarsılmışıq. Yaralılara görə təəssüfləndiyimizi bildirir, həlak olanların ailələrinə isə dərin hüznlə başsağlığı veririk”.
Oxu.Az-ın məlumatına görə, bunu ABŞ Dövlət Departamentinin mətbuat katibinin müavini Vedant Patel Azərbaycanın Xocavənd rayonunun Edilli kəndində daha bir kütləvi məzarlığın aşkarlanmasını şərh edərkən deyib.
O, müharibə dövründə bir çox ailələrin zərər gördüyünü vurğulayıb və bildirib ki, Qarabağ müharibəsi zamanı bu insanların itirdikləri yaxınlarına görə təqsirkarlar cavab verməli, hərbi cinayətlərdə günahı olan bütün şəxslər məsuliyyətə cəlb edilməlidirlər.
“Biz həqiqət və sülhün təşviqi üzrə beynəlxalq səyləri dəstəkləməyə davam edir, bu proseslərin Azərbaycan və Ermənistan arasında davam edən sülh prosesi ilə paralel gedə biləcəyini hesab edirik”, – deyə Vedant Patel sözlərini yekunlaşdırıb.
Xatırladaq ki, bir neçə gün öncə Xocavənd rayonunun Edilli kəndində növbəti kütləvi məzarlıq aşkarlanıb. Səhiyyə Nazirliyinin Məhkəmə-Tibbi Ekspertizası və Patoloji Anatomiya Birliyinin sədri Ədalət Həsənov həmin qalıqların 12 nəfər Azərbaycan hərbçisinə məxsus olduğunu açıqlayıb. Məlumata görə, dişlər və digər sümüklərdən nümunələr götürülərək məhkəmə genetik ekspertizası aparılaraq hərbçilərin şəxsiyyətləri aydınlaşdırılacaq. Məhkəmə-tibbi ekspertizası da, genetik ekspertiza da 15 gün çəkəcək.
Faktla bağlı Hərbi Prokurorluqda Cinayət Məcəlləsinin 115.4, 120.2.1, 120.2.7 və 120.2.12-ci maddələri ilə cinayət işi başlanılaraq istintaq aparılır.
