“Azəriqazbank” rəhbərinin sabiq müşaviri Çingiz Mənsimova qarşı dələduzluq etməkdə ittiham olunan sürücüsü Şahin Fətəliyev və İlham Qasımovun cinayət işi üzrə məhkəmə prosesi keçirilir.
APA xəbər verir ki, Bakı Ağır Cinayətlər Məhkəməsində hakim Azər Paşayevin sədrliyi ilə keçirilən iclasda sabiq bank rəhbəri müşavirinin qızı Fərəh Mənsimova dindirilib.
İttihama görə, Çingiz Mənsimovun sürücüsü olmuş Şahin Fətəliyev onun etibarından sui-istifadə edərək mənzillərini, bağ evini, avtomobilini gizli şəkildə satıb.
Fərəh Mənsimova ifadəsində xaricdə yaşadığını, atasının evinin dələduzluq yolu ilə ələ keçirilməsindən sonradan xəbərdar olduğunu deyib:
“Mən xaricdə yaşayıram. Bakıya gəlmişdik. Yoldaşımın telefonuna zəng gəldi, dedilər ki, əgər gəlib qeydiyyatdan çıxmasanız, məhkəməyə verəcəyik. Ondan sonra bildik ki, ev satılıb. Sonra məlum oldu ki, sürücüsü atamın digər evlərini, maşınını da satıbmış. Şahin Fətəliyev təxminən 25 il ərzində atamın sürücüsü olub. Ona ailələrinin bir üzvü kimi yanaşmışıq, mən ona “dayı” deyirdim”.
Şahid qeyd edib ki, atası dializ xəstəsi olduğu üçün tez-tez, İsrailə gedib-gəlirmiş. Buna görə burda olmadığı müddətdə lazım olan hüquqi addımların atılması üçün sürücüsünə etibarnamə verib:
“Bir evi atamın adından tanışı İlham Qasımovun adına keçirib, sonra da satıb. Sonra bildik ki, bağ evimizi də satışa çıxarıb, 44 sot ərazisi, 300 kvadratmetr evi olan bağı 100 min manata satışa çıxarıb. Bundan əlavə, atamın “Toyota Prado” markalı maşını vardı, onu Lənkərandan kiməsə satıbmış. Bizə də deyirdi ki, maşın ustadadır…”
Zərərçəkmiş Çingiz Mənsimov bir müddət öncə vəfat edib. Onun qızı Fərəh Mənsimova Şahin Fətullayevə qarşı 700 min manatlıq mülki iddia qaldırıb.
Şahin Fətəliyevin ələ keçirdiyi mənzillərdən birini adına keçirdiyi İlham Qasımov da cinayət məsuliyyətinə cəlb olunub.
Şahin Fətullayev məhkəmədə özünü qismən təqsirli bildiyini deyib. İlham Qasımov isə özünü ümumiyyətlə təqsirli bilməyib.
Qeyd edək ki, ittiham olunan şəxslər barəsində Cinayət Məcəlləsinin 178 (dələduzluq) maddəsi ilə cinayət işi başlanıb.
Təqsirləndirilən Şahin Fətəliyev barəsində həbs-qətimkan, İlham Qasımov barəsində isə istintaq və məhkəmə dövründə başqa yerə getməm barəsində iltizam qətimkan tədbiri seçilib.
www.102info.az
