Ağsu sakini Təranə Əliyeva ömrü boyu uşaq arzusunda olsa da, ana ola bilməyib.
2017-ci ildə qadının qeydiyyatda olduğu uşaq evinin işçiləri ona bildiriblər ki, Bakıdan olan ailə 10 aylıq övladları Əlini tərk etmək niyyətindədir. T.Əliyeva və həyat yoldaşı dərhal oğlanı övladlığa götürmək qərarına gəliblər. Yalnız bu proses başa çatdıqdan sonra onlar bioloji valideynlərin körpənin xəstəliyini onlardan gizlətdiklərini öyrəniblər.
“Valideynləri Əlinin sağlam olmadığını biləndə onu müvəqqəti olaraq xəstəxanaya yerləşdiriblər, sonra isə uşaq evinə qoymağı planlaşdırıblar. Mənə dedilər ki, uşaq pnevmoniyadan əziyyət çəkir. Bu məni qorxutmadı, çox istəyirdim ki, övladlığa uşaq götürüm, çünki analıq hissinin bəxş etdiyi xoşbəxtliyi heç vaxt duymamışdım”, – deyə Təranə Əliyeva Media.Az-a bildirib.
O, əri ilə Əlini övladlığa götürüb, ona atalığının soyadını – Əzizxanlı – veriblər.
Körpədə güclü öskürək olduğuna görə T.Əliyeva onu həkimə aparıb və burada eşitdikləri onun üçün gözlənilməz olub. Mütəxəssis bildirib ki, Əlidə pnevmoniya yoxdur, onun gözləri, demək olar ki, görmür.
“Müayinələrdən sonra bildim ki, oğlum serebral iflicdir… Həkimlər dedilər ki, belə uşaqla çətin olacaq, onu bioloji valideynlərinə qaytarmağa çağırdılar. Ancaq mən bunu edə bilmədim… O vaxt ərim bununla barışa bilmədi və biz onun istəyi ilə boşandıq”, – Təranə Əliyeva deyib.
Ancaq bu, qadını sındırmayıb, o, həyatını oğluna həsr edib və onun sağalması üçün hər şeyi edir. Təranə Əliyeva 28 il notariat kontorunda baş məsləhətçi işləyib, lakin Əliyə baxmaq üçün hər şeyi buraxmalı olub.
Qadının dediyinə görə, indi o, notariat arxivində işləyir və istənilən yarımştat işi görür:
“Uşağın müalicəsi üçün evi satdım. Onun səhhəti ilə Bakıdan gələn mütəxəssislər məşğul olurlar, ona görə də iki şəhərdə yaşamalı oluruq. 10 gün Ağsuda pul qazanıram, qalan 10 gününü isə paytaxtda yaşayırıq ki, reabilitasiya keçək. Bakıda gah hansısa qohumların, gah da başqalarının yanında qalmalı oluruq…”
Ağsu sakini müalicənin Əliyə çox kömək etdiyini deyir. Üç ay nevroloqa getdikdən sonra onun görmə qabiliyyəti bərpa olunub. Lakin uşaq hələ də danışa və ya hərəkət edə bilmir.
“Yadımdadır, elə günlər olurdu ki, Əli ağrıdan elə qışqırırdı ki, səsi batırdı, səhərə qədər yatmırdı. Mən də normal yemək yeyib yata bilmirdim, səhər tezdən ancaq üzümü yuyub işə gedirdim. Allaha şükür, indi oğlum daha yaxşıdır, ən əsası da indi onun danışmaq, yerimək şansı var”, – Təranə Əliyeva vurğulayır.
O, bu yolda bir çox xeyirxah insanlarla qarşılaşdıqlarını və onların bacardıqları qədər ana-balaya köməklik göstərdiklərini də qeyd edir. Onun sözlərinə görə, həmin insanlardan biri də loqoped-defektoloq Esmira Qafarovadır:
“Biz Esmira xanımın Mərkəzinə gedirik. Reabilitasiya seansı 45 manatdır, amma əvvəlcə bizə 15 manat endirim etdi, indi isə cəmi 10 manat veririk. O, bizə bahalı xüsusi ayaqqabılar da verib. Bundan əlavə, Mərkəzin Firişdə adlı əməkdaşı da bizə çox kömək edir”.
Oktyabrın 24-də Təranə xanımın uşağı övladlığa götürməsinin beş ili tamam olub. Qadının sözlərinə görə, bu illər ərzində oğlanın bioloji valideynləri heç vaxt onun səhhəti barədə maraqlanmayıblar:
“Əli yanvarın 1-də doğulsa da, biz onun ad gününü oktyabrın 24-də qeyd edirik. Bu beş il ərzində mən şəhərimizin bütün xəstəxanalarında olmuşam. Əli mənim üçün əzizdir, həyatda ən böyük sərvətimdir. Onu itirməkdən çox qorxuram.
Həkimlər MRT çəkdirməyi tövsiyə ediblər (anesteziya köməyi ilə), amma xəbərdarlıq ediblər ki, uşaq oyanmaya bilər. Uzun müddət bundan qaçdım, amma həkimlərin təkidi ilə riskə getdim. Oğlumu MRT-yə aparanda pəncərənin yanında dayandım və düşündüm ki, Əlim oyanmasa, özümü buradan atacağam…”
T.Əliyeva övladını mütəmadi olaraq həkimlərə aparmağa davam edir və evdə onun inkişafı ilə məşğul olur. İki ayda bir dəfə onlara ümumi qiyməti 300-500 manat arasında dəyişən dərmanlar yazılır.
“Bizim hekayəmizi oxuyandan sonra kimsə bunun fərqinə varıb Əlinin müalicəsinin davam etdirilməsinə kömək etmək istəsə, çox şad olaram. Bununla belə, biz mənəvi dəstək almağa da şad olarıq, bu, bizə təslim olmamaq və irəliləmək üçün güc verəcək”, – deyə Təranə Əliyeva yekunlaşdırıb.
Təranə xanıma maddi və ya digər yardım göstərmək istəyənlər +994 51 449 70 16 və +994 70 449 70 16 nömrələri ilə əlaqə saxlaya bilərlər.
www.102info.az
