“Nitq qüsurları anadangəlmə olmur. Üç yaşından sonra uşaq cümlə qurmalıdır. Şifahi nitqin bitməsi özünü beş yaşında göstərir”.
Oxu.Az xəbər verir ki, bu fikirləri Səhiyyə Nazirliyinin mütəxəssis-eksperti, loqoped Aygün Ələkbərova nazirliyin “Instagram” səhifəsində canlı yayım zamanı uşaqlarda nitq qüsurları barədə məlumat verərkən deyib.
O bildirib ki, uşaqlar individualdırlar:
“Hər uşaq eyni cür inkişaf prosesi keçmir. Lakin uşaqların nitqində qüsur olmamalıdır. Həkim psixiatrların və psixoloqların konsultasiyası zamanı uşağın nitqində hansısa qüsurun mövcudluğu aşkarlanarsa, müalicə tərtib edilir. Yoxdursa, uşaqların üç yaşına qədər müəyyən cümlə qurması gərəklidir”.
Əgər uşaqlar stress, zədə alıblarsa, bu yaşlarda kəkələmə ola bilər:
“Beş yaşından altı yaşına keçən uşaqlarda da bu kimi problemlər yaşana bilər. Danışıq tempi özü də bu kimi problemlərin yaranmasına səbəb ola bilər. Əgər uşaqlarda ciddi nitq problemi varsa, üç yaşdan sonra loqopedə müraciət edilə bilər. İstisna hallarda mürəkkəb nitq qüsuru aşkarlanarsa, üç yaşdan tez də loqopedə müraciət edilə bilər”.
Könül Cəfərli
www.102info.az
