“Vergi Məcəlləsinə təklif edilən dəyişikliklərə əsasən, gələn ildən “ƏDV geri al” qaydalarının dəyişdirilməsi nəzərdə tutulur”.
Bunu deputat Vüqar Bayramov öz “Facebook” hesabında yazıb.
V.Bayramov vurğulayıb ki, nağdsız əməliyyatların stimullaşdırılması məqsədilə geri qaytarılan ƏDV-nin nağd əməliyyatlara görə 10 faizdən 5 faizə endirilməsi, nağdsız əməliyyatlara görə isə 15 faizdən 17,5 faizə qaldırılması təklif olunur.
Təqdim edilən dəyişikliklər dünən Milli Məclisin İqtisadi siyasət, sənaye və sahibkarlıq komitəsinin iclasında ikinci oxunuşda müzakirə olunub.
“Təbii ki, dəyişikliklər qeyri-nağd ödənişlərin stimullaşdırılması baxımdan vacibdir. “ƏDV geri al” mexanizmində əsas məqsəd də məhz vətəndaşlarda plastik kartlardan istifadə vərdişlərinin genişləndirilməsi və institusional olaraq nağdlı hesablaşmaların minimumlaşdırılması məqsədi daşıyır. Bu, iqtisadiyyatın ağardılması islahatlarının dərinləşdirilməsi baxımından vacib idi. Bununla yanaşı, komitə iclasında müzakirələr zamanı nağdsız əməliyyatlara görə qaytarılan ƏDV-nin 15 faizdən 17,5 faizə deyil, 20.0 faizə atırılmasını təklif etdim. Nağdlı ödənişlər üzrə 5 faiz bəndi azalmanın olduğunu nəzərə alsaq, nağdsız ödənişlər üzrə oxşar həcmdə artım məqsədəuyğun olardı. Bu, plastik kartlardan istifadəyə marağı daha da artırardı. Bütövlükdə, Vergi Məcəlləsinə edilən dəyişikliklər stimullaşdırıcı xarakter daşıyır və dəyişikliklər real sektorun yeni güzəştlərdən faydalanmasına imkan yaradacaq”, – deyə deputat qeyd edib.
www.102info.az
