Martın 22-si Əməkdar mədəniyyət işçisi Oqtay Əliyevin ölümü ilə nəticələnən qəzada yaralanan Xalq artisti Mehriban Zəki hadisədən sonra ilk dəfə paylaşım edib.
Oxu.Az-ın məlumatına görə, “Instagram” hesabında paylaşım edən M.Zəki O.Əliyev haqda xatirələrini bölüşüb.
“İlk tanıdığım gündən hər zaman bütün problemlərin həllini tapar, xəstələnəndə belə, “problem yoxdur, keçib gedəcək” deyər, insanları yalnız gülərüz görmək istər, hər zaman hamını süfrə başına yığar, həmin süfrəni şəxsən özü açmaqdan zövq alar, bütün arzularında İrəvana getmək istəyərdi.
Hər zaman hay-küylü, coşub-daşan Oqtayın həmin an səsi belə çıxmadı. Bu dəfə Dilarə ilə mən qışqırırdıq: Oqtay… Oqtay… Oqtay… O isə susurdu. O susurdu, maşın çevrilirdi. Bu, sadəcə, qəzavü-qədər idi. Mən sağalacağam. Qolum da, qabırğalarım da bitişəcək, üzüm də bərpa olacaq. Dilarə də, inşallah, özünü toparlayar. O, çox güclü qadındır. Amma Oqtay əbədi susacaq. Allah sizə rəhmət eləsin, Oqtay. Martın 22-si belə yazıldı bizim üçün”.
Xatırladaq ki, Saray yolunda qeydə alınan sözügedən qəzada xəsarət alan Dilarə Əliyevaya yerində ilkin tibbi yardım göstərilib, M.Zəki xəstəxanada müalicəsini davam etdirir.
www.102info.az
