Abşeron rayonu, Xırdalan şəhərində bir neçə il əvvəl mənzildə qaz sızması nəticəsində baş verən partlayışdan sonra bina təmir edilməyib.
Bu barədə Oxu.Az-a ərazidə yaşayan sakinlər bildiriblər.
Qeyd edilib ki, Xırdalan şəhəri, 20-ci məhəllədə yerləşən beşmərtəbəli yaşayış binasının dördüncü mərtəbəsində baş verən partlayışdan sonra dövlət qurumları tərəfindən təmir aparılmayıb.
Abşeron Rayon İcra Hakimiyyətindən Oxu.Az-a bildirilib ki, layihə ilə bağlı qurum tərəfindən bütün sənədlər hazırlanıb.
Fövqəladə Hallar Nazirliyindən isə Oxu.Az-ın sorğusuna cavab olaraq bildirilib ki, sözügedən binanın təmiri tender mərhələsindədir:
“Bu ayın sonuna kimi məsələ tam həllini taparsa, iyulun ilk ongünlüyündə ərazidə təmir işləri başlanacaq”.
Qeyd edək ki, 2021-ci ilin may ayının 22-də Abşeron rayonunun Xırdalan şəhərində yerləşən çoxmərtəbəli yaşayış binasının dördüncü mərtəbəsində yerləşən ikiotaqlı mənzildə yanğınla nəticələnən partlayış hadisəsi baş verib. Nəticədə binaya zərər dəyib.
İlhamə Əbülfət
www.102info.az
