“Azərbaycandakı şirkətlərlə məlumat mübadiləsi, texnologiya transferi, investisiya yatırımları, telekommunikasiya sistemində Azərbaycan və Türkiyə istehsalı olan avadanlığın istifadəsi istiqamətində danışıqlar aparırıq”.
“Report” xəbər verir ki, bunu jurnalistlərə açıqlamasında Türkiyə Kommunikasiya Texnologiyaları Klasterinin rəhbəri İlyas Kayaduman deyib.
Onun sözlərinə görə, Türkiyədə 160-dan çox şirkətlə bərabər, sadəcə, telekommunikasiya sektorunda çalışan və Türkiyə şirkətlərindən ibarət bir klaster var:
“Bu şirkətlərlə bərabər çalışmaqda əsas məqsəd başda Türkiyə olmaq üzrə telekommunikasiya sistemində türk istehsalı olan milli və yerli avadanlıqların istifadəsinin artmasını təmin etməkdir. Bizim qurumun əsası 2017-ci ildə qoyulub və bu günədək ciddi uğurlar əldə etmişik”.
O qeyd edib ki, bu uğurları Azərbaycana da gətirmək istəyir:
“Azərbaycandakı yerli şirkətlərlə də əməkdaşlıqlar qurub, buradakı fürsətləri dəyərləndirərək ölkədə telekommunikasiya ekosisteminin genişləndirilməsi istiqamətində birgə işləmək niyyətindəyik”.
İ.Kayaduman bildirib ki, ötən səkkiz-doqquz ay müddətində bu tədbirlərin həyata keçirilməsi üçün həm Azərbaycanın Rəqəmsal İnkişaf və Nəqliyyat Nazirliyinin tabeliyindəki İnnovasiya və Rəqəmsal İnkişaf Agentliyi tərəfindən, həm də Türkiyə tərəfindən ciddi işlər görülüb. Şirkətlərimizi bir araya gətirərək dinamizmi ortaya çıxarmaya çalışırıq. Birlikdə daha yaxşı layihələr ortaya qoyacağımıza inanırıq”.
www.102info.az
