Bakı. Trend:
Xankəndidə keçirilən Diaspor Gənclərinin VI Yay Düşərgəsində
növbəti görüş baş tutub. Bu dəfə düşərgə iştirakçıları Azərbaycanın
tanınmış idmançıları və idman jurnalistləri ilə bir araya
gəliblər.
Trend
xəbər verir ki, bu barədə Diasporla İş üzrə Dövlət Komitəsi məlumat
yayıb.
Bildirilib ki, tanınmış idman jurnalistləri Gündüz Abbaszadə və
İlkin Xəlilovun moderatorluğu ilə keçirilən görüşdə azərbaycanlı
paraatlet, 4 qat dünya çempionu və “Paris 2024” Paralimpiya
Oyunlarının qalibi Lamiyə Vəliyeva, güləş üzrə 2 qat dünya və 3 qat
Avropa çempionu, “Tokio 2020” Olimpiya Oyunlarının mükafatçısı
Rafiq Hüseynov və əfsanəvi idmançı, Olimpiya Oyunlarında
Azərbaycanın yeganə 5 qat iştirakçısı, 4 qat mükafatçısı, 2 qat
dünya və 10 qat Avropa çempionu, Avropa Oyunları və İslam Həmrəylik
Oyunlarının 2 qat qalibi Mariya Stadnik iştirak ediblər.
Azərbaycan bayrağını beynəlxalq arenalarda qürurla dalğalandıran
idmançılar şəxsi təcrübələrini paylaşıb, gənclərin çoxsaylı
suallarını cavablandırıblar. Düşərgə iştirakçılarına Azərbaycanın
idman sahəsindəki nailiyyətləri, qazandıqları uğurlar və gənc
nəslin bunları davam etdirməsi üçün maraqlı tövsiyələr verilib.
Onlar gənclərə şəxsi karyeralarından örnəklər çəkərək istedad və
bacarığı inkişaf etdirmək üçün intizam və məqsədə doğru sistemli
irəliləyişin vacibliyini dilə gətiriblər. İdmançıların cavabları
gənclərin böyük marağına səbəb olub, onların paylaşdıqları bilgilər
coşğu ilə qarşılanıb. Panel maraqlı müzakirələrlə davam edib,
soydaşlarımız bu görüşü yüksək qiymətləndiriblər.
Qeyd edək ki, avqustun 3-dən 9-dək davam edəcək Diaspor
Gənclərinin VI Yay Düşərgəsi Azərbaycan Respublikası Diasporla İş
üzrə Dövlət Komitəsinin və Heydər Əliyev Fondunun birgə
təşkilatçılığı ilə keçirilir. Diaspor Gənclərinin VI Yay
Düşərgəsində dünyanın 61 ölkəsindən 128 gənc iştirak edir. Bundan
əvvəlki düşərgələr Şəki, Şamaxı, Şuşa, Naxçıvan və Laçın
şəhərlərində baş tutub, düşərgələrə hər il 60-dan çox ölkədən
ümumilikdə 700-dən çox gənc qatılıb.
