Bakı.Trend:
Yük və sərnişin daşımaları həyata keçirənlər arasında
maarifləndirmə tədbiri keçirilib
Trend xəbər
verir ki, bu barədə Azərbaycan Yerüstü Nəqliyyat Agentliyi məlumat
yayıb.
Bildirilib ki, Avtomobil nəqliyyatı ilə sərnişin və yük
daşımaları fəaliyyəti göstərən hüquqi və fiziki şəxslərin buraxılış
vəsiqəsi, buraxılış kartı, reysqabağı texniki və tibbi müayinələrin
keçirilməsi vəziyyəti və formulyarların tərtib edilməsinin
yoxlanılması və bu sahədə qanunvericiliyə müvafiq olaraq
tədbirlərin görülməsinin təbliği məqsədilə Azərbaycan Yerüstü
Nəqliyyat Agentliyi (AYNA) və Bakı Şəhər Dövlət Yol Polisi İdarəsi
(BŞDYPİ) birgə marifləndirici reydlər həyata keçirib.
Qeyd olunub ki, reydlər nəticəsində 56 nəqliyyat vasitəsinin
buraxılış kartı və buraxılış vəsiqəsi olmadan fəaliyyət göstərdiyi,
4 nəqliyyat vasitəsinin texniki vəziyyətinin reysqabağı
yoxlanışdan, sürücünün isə reysqabağı tibbi müayinədən keçmədiyi
müəyyən edilib. Sürücülərlə izahedici söhbətlər aparılıb və
qanunvericiliyin tələblərinə riayət etmələri tövsiyə olunub.
Məlumatda deyilir ki, avtomobil nəqliyyatı ilə yük və sərnişin
daşımaları sahəsində daşıyıcıların qanunvericiliyə uyğun
fəaliyyətini yoxlamaq və sürücüləri maarifləndirmək məqsədilə
tədbirlər davam etdirilir.
