Litva Rusiya hüquq-mühafizə sisteminin 15 nümayəndəsinin ölkəyə girişini qadağan edib.
Qeyd edilən hüquq-mühafizə sistemi nümayəndələrinin Rusiya Federasiyası Cinayət Məcəlləsinin “Dövlətə xəyanət” və “RF Silahlı Qüvvələri haqqında dezinformasiyanın yayılması” maddələri üzrə 25 il müddətinə azadlıqdan məhrum edilmiş rusiyalı jurnalist Vladimir Kara-Murzanın işi ilə əlaqəli olduğu bildirilir.
Bu barədə Litva xarici işlər naziri Qabrielius Landsberqis özünün “Twitter” səhifəsində məlumat verib.
“Müxalifətçi siyasətçi Kara-Murzanın təqibinə cavab olaraq Litva onu təqib edən Rusiya ədliyyə sistemindəki 15 nəfərin ölkəyə girişini qadağan edib”, – deyə nazir qeyd edib.
Xatırladaq ki, 2023-cü il aprelin 17-də Moskva Şəhər Məhkəməsi Kara-Murzanı dövlətə xəyanət, arzuolunmaz təşkilatın fəaliyyətində iştirak və Rusiya ordusunun nüfuzdan salınması maddələri üzrə 25 il müddətinə azadlıqdan məhrum edib.
Elə həmin ay Böyük Britaniya Kara-Murza ilə bağlı hökm çıxarılmasında iştirak edən müstəntiqlərə və hakimə, həmçinin Rusiya Federal Təhlükəsizlik Xidmətinin iki əməkdaşına qarşı sanksiyalar tətbiq edib.
Rusiyanın Londondakı səfirliyi Britaniyanın yeni sanksiyalarını qeyri-qanuni və hüquqi cəhətdən etibarsız adlandırıb.
Mənbə: Gazeta.ru
www.102info.az
