Bu gün İslami Müqavimət Hərəkatının (HƏMAS) hərbi qanadının rəhbəri Məhəmməd Deyf İsrailə qarşı “Əl-Əqsa tufanı” adlı hərbi əməliyyata başladığını açıqlayıb. Deyf bütün fələstinliləri silaha sarılmağa çağırıb. Hərəkat İsrail ərazisinə 5000 raket atıb, onun pərdəsi altında yaraqlılar İsrail ərazisinə daxil olaraq “Erez” keçid məntəqəsini və bəzi məskunlaşan əraziləri ələ keçirib. Çoxlu sayda mülki vətəndaşın öldüyü bildirilir. Eyni zamanda da İsrail Ordusu Qəzza zolağında “Dəmir qılınclar” adlı antiterror əməliyyatına başladığını elan edib.
İsraildə baş verənləri Oxu.Az-a şərh edən İsrail polisinin beynəlxalq şöbəsinin keçmiş əməliyyat müvəkkili, təhlükəsizlik eksperti Sergey Miqdal qeyd edib ki, HƏMAS-ın bu əməliyyata bir neçə ay hazırlaşdığı aydın məsələdir.
– Onlar birbaşa, hasarın o üzündən keçiblər. Hücum şənbə günü (İsraildə qeyri-iş günüdür – red.), Simxat Tövrat bayramında başlayıb.
– Bəs niyə bu, məhz indi baş verdi?
– HƏMAS hərəkatı hazırda Fələstin Muxtariyyətinin hakimiyyət orqanları ilə ciddi qarşıdurma içindədir. HƏMAS-ın nəzarət etmədiyi İordan çayının qərb sahilində Qəzza zolağından fərqli olaraq, hətta yaraqlılarla Fələstin polisi arasında da silahlı toqquşmalar baş verib. Bundan başqa, Livanda HƏMAS və Fələstin Milli Azadlıq Hərəkatı (FƏTH) arasında münaqişə var. Bundan başqa, İslami Müqavimət Hərəkatı Mərakeş, Bəhreyn, Birləşmiş Ərəb Əmirlikləri, Oman kimi mötədil ərəb dövlətlərinin İsraillə yaxınlaşmasından çox narazıdır. Səudiyyə Ərəbistanı ilə də danışıqlar davam edir. Buna görə də HƏMAS Fələstin xalqının əsas müdafiəçisi və aparıcı qüvvəsi kimi mövqeyini ortaya çıxarmaq üçün bu vəziyyəti partlatmağa qərar verdi. Və onlar FƏTH və Fələstin hökumətini əməkdaşlıqda ittiham edirlər.
– İsrail ordusu, kəşfiyyatı əhalinin məskunlaşdığı ərazilərin ələ keçirilməsinə səbəb olan belə genişmiqyaslı əməliyyatı necə gözdən yayındırıb?
– Bəli, məsələn, söhbət Kibbutz Beeridən gedir. Bu, Qəzzanın 300 metrliyində yerləşən tamamilə dinc qəsəbədir. Onlar, həmçinin səhər və axşam kənd təsərrüfatında və tikintidə çalışan minlərlə fələstinli fəhlənin keçdiyi “Erez” keçid məntəqəsi yaxınlığındakı bazalardan birini ələ keçirdilər. Bu, sıçrayışın əsas yerinə çevrildi.
Bazaya gəlincə, artıq dediyim kimi, bu gün şənbə günüdür, həm də Simxat Tövrat bayramıdır. Keçmiş hərbçi kimi deyə bilərəm ki, belə bir gündə bazada altı-yeddi nəfər qalır. Biri qapıda, ikisi patrulda, üçü dincəlir. Bu, təbii ki, bir hərbi kəşfiyyatçı kimi mənim nöqteyi-nəzərimdən biabırçılıqdır. Nə isə baş verəcəyi barədə məlumat ortaya çıxmalı idi. Belə hallarda gücləndirmə olur, məzuniyyətlər ləğv edilir, qüvvələr sərhədə doğru yaxınlaşır.
Lakin bu dəfə hərbi kəşfiyyat HƏMAS-ın genişmiqyaslı əməliyyata hazırlığını gözdən yayındırıb. Biz başa düşməliyik ki, qarşı tərəfdəkilər də axmaq deyil. HƏMAS rəhbərliyi və onun hərbi liderləri heç də səfeh deyillər.
Amma bütün yaşayış məntəqələri, bütün ərazi tezliklə döyüşçülərdən təmizlənəcək. Məsələ isə bu işdə qurbanların sayıdır.
– İsraildə bir neçə aydır məhkəmə islahatlarına qarşı etirazlar keçirilir. Yüzlərlə ehtiyatda olan hərbçi etiraz əlaməti olaraq təlim-məşq toplanışlarında iştirak etməyəcəklərini elan etdi və s. Bütün bunlar orduya təsir edə, diqqətini zəiflədə bilərmi?
– Ordunun faktiki zəifləməsi yox idi, lakin bunun psixoloji təsiri olmuşdu. Enerjini, fikrimcə, gərəksiz olan bu islahat ətrafında mübahisələrə deyil, müdafiənin gücləndirilməsinə sərf etmək daha yaxşı olardı.
Yeri gəlmişkən, ehtiyatda olan əsgərlərdən danışanda başa düşməliyik ki, bunlar təlim-məşq toplanışına gəlməkdən imtina edən könüllülərdir. Onsuz da bunu etmək məcburiyyətində deyildilər. Amma bu gün səhər onların hamısı imtinalarını ləğv edib orduya getdilər.
– Niyə “Hizbullah” yox, HƏMAS silahlıları hücum edib? Başa düşdüyüm qədər, İslami Müqavimət Hərəkatının indi İranla heç bir əlaqəsi yoxdur, “Hizbullah” isə guya iranpərəstdir, amma onlar müdaxilə etməyiblər…
– “Hizbullah” həqiqətən də, İranın əlaltısıdır. HƏMAS isə sünni hərəkatıdır, qlobal “Müsəlman Qardaşlar” hərəkatının bir hissəsidir. Onlar şiə islamına qarşıdırlar. Amma 2011-ci ilə qədər İran HƏMAS-a müəyyən yardımlar edib. Tehranın Suriyada Bəşər Əsədi dəstəkləməsi, İslami Müqavimət Hərəkatı isə sünni Suriya müxalifətinin tərəfinə keçməsi ilə onların yolları ayrılıb.
“Hizbullah”ın niyə müdaxilə etməməsinə gəlincə. Biz başa düşməliyik ki, bu həm də siyasi partiyadır, Livan daxilində mühüm siyasi oyunçudur. Və onların Beyrutda öz mürəkkəb siyasi oyunları var.
Nair Əliyev
www.102info.az
