Avropa İttifaqı, ABŞ və Böyük Britaniya Rusiyanın Ukraynaya qarşı apardığı müharibə zamanı müharibə cinayətlərinin araşdırılması üzrə səyləri əlaqələndirmək üçün Qəddar Cinayətlər üzrə Məsləhət Qrupu (ACA) yaradıb.
Bu barədə ABŞ Dövlət Departamenti müvafiq bəyanat yayıb.
“ACA Rusiyanın Ukraynaya qarşı apardığı təcavüzkar müharibə kontekstində törədilən vəhşiliklərə görə məsuliyyətə cəlb etmək üçün Aİ, ABŞ və Böyük Britaniyanın davam edən səylərini gücləndirəcək. Qrup Ukrayna üçün bu mühüm məqamda beynəlxalq dəstək və həmrəylik nümayiş etdirmək məqsədilə Aİ, ABŞ və Böyük Britaniyanın üzərinə götürdüyü öhdəliklərin təşviqi ilə məşğul olacaq”, – deyə bəyanatda bildirilir.
ACA-nın əsas missiyası Ukrayna Baş Prokurorluğunun bölmələrinə hərbi cinayətlərin araşdırılmasında dəstək olmaqdır.
Aİ-nin Xarici Əlaqələr üzrə Ali Nümayəndəsi Jozep Borrel qrupun yaradılmasını şərh edərkən bildirib ki, Rusiyanın Ukraynaya əsassız hərbi təcavüzü zamanı törədilmiş dəhşətli vəhşiliklərə görə məsuliyyət daşıyan bütün şəxslərin məsuliyyətə cəlb olunmasını təmin etmək çox vacibdir.
“Müharibə cinayətləri cəzasız qala bilməz”, – deyə Borrel vurğulayıb.
ABŞ Dövlət katibi Entoni Blinken bildirib ki, bu təşəbbüs “Rusiya hərbçilərinin Ukraynada törətdiyi hərbi cinayətlər və digər vəhşiliklərin sübutlarını sənədləşdirmək, qorumaq və təhlil etmək üçün Baş Prokurorluğun səylərini birbaşa dəstəkləyəcək”.
Mənbə: Unian.net
www.RIA24.az
