Ukraynanın Nikolayev vilayətində hücum zamanı rusiyalı hərbçilər humanitar yardımın olduğu anbarı dağıdıblar.
Bu barədə Nikolayev vilayəti Hərbi Administrasiyasının sədri Vitali Kim məlumat verib.
“Səhər saat 3-də rus işğalçıları humanitar qərargahlarımızdan birini iki raketlə vurdular. Uşaqlar və qocalar üçün nəzərdə tutulan minlərlə ton məhsul tamamilə yanıb”, – deyə o açıqlama verib.
Vitali Kim humanitar yardımın olduğu anbarlardan birinin raket zərbələrindən sonra görüntülərini də paylaşıb.
Regional Hərbi Administrasiyanın rəhbəri düşmən raketlərinin humanitar qərargahı vurduğu anı da yayımlayıb.
Gecə şəhər meri Aleksandr Senkeviç Nikolayevdə güclü partlayış səslərinin eşidildiyini bildirib.
Daha sonra Regional Hərbi Administrasiya rəhbəri məlumat verib ki, iyulun 21-nə keçən gecə rus işğalçıları Nikolayevə yeddi “S-300” raketi atıb və xeyli ziyan vurub.
Onun sözlərinə görə, hazırda bir zərərçəkən məlumdur. Daha ətraflı məlumatlar dəqiqləşdirilir.
Mənbə: UNİAN
