Bakı. Trend:
Cari ilin iyun ayının sonuna Azərbaycanda mikro sahibkarlıq
subyektlərinə verilən kreditlərin həcmi 3,202 milyard manat təşkil
edib.
Trend-in
Azərbaycan Mərkəzi Bankından əldə etdiyi məlumata görə, bu, may
ayının sonu ilə müqayisədə 12,4 milyon manat və ya 0,4% çoxdur.
Belə ki, cari ilin may ayının sonunda Azərbaycanda mikro
sahibkarlıq subyektlərinə verilən kreditlərin həcmi 3,190 milyard
manat idi.
Qeyd edək ki, bu ilin iyun sonuna Azərbaycan banklarının biznes
kredit portfelinin həcmi 15,144 milyard manat təşkil edib.
Xatırladaq ki, cari ilin 1 iyul tarixinə ölkədə fəaliyyət
göstərən mikrosahibkarlıq subyektlərinin sayı 184,4 min ədəddir.
Ölkə üzrə kommersiya təşkilatlarının ümumi sayının 91,4 faizini
mikro sahibkarlıq subyektləri təşkil edir. Onların əsas hissəsi
“Ticarət; nəqliyyat vasitələrinin təmiri” (35%), “Digər sahələrdə
xidmətlərin göstərilməsi” (11,3%), “Tikinti” (9,2%), “Peşə, elmi və
texniki fəaliyyət” (7,8%) və “Kənd təsərrüfatı, meşə təsərrüfatı və
balıqçılıq” (6,5%) sahələrində yaradılıb.
