Bakı. Trend:
Bu ilin birinci yarısında bp və onun əməliyyatçısı olduğu birgə
layihələrdəki tərəfdaşları sosial investisiya layihələrinə
Azərbaycanda təxminən 0,7 milyon dollar vəsait xərcləyiblər.
Bu barədə Trend bp-yə istinadən xəbər verir.
Məlumata görə, bu göstərici ötən ilin eyni dövrü ilə müqayisədə
0,2 milyon dollar və ya 40% çoxdur.
Qeyd edilib ki, ilk altı ay ərzində bu layihələrə hazırda davam
edən 17 təhsil proqramı və yerli bacarıqların yaradılmasını və
sahibkarlığın inkişafını dəstəkləyən 1 layihə daxil idi.
Bundan əlavə, bp ayrıca bir şirkət kimi öz adından Azərbaycanda
sponsorluq etdiyi layihələrə ilin birinci yarısında təxminən 0,4
milyon dollar vəsait xərcləyib.
Bunlara hazırda davam edən 19 təhsil təşəbbüsü, yerli
bacarıqların yaradılmasını və sahibkarlığın inkişafını dəstəkləyən
1 layihə, ətraf mühit üzrə 5 təşəbbüs və müxtəlif mövzularda 7
konfrans və seminara dəstək, yəni ümumilikdə 32 layihə
daxildir.
Qeyd edək ki, bp və tərəfdaşlarının sosial investisiya
layihələrinə təhsil proqramları, yerli icmalarda bacarıq və
qabiliyyətlərin yaradılması vasitəsilə yeni imkanların açılması,
icmalarda sosial infrastrukturun təkmilləşdirilməsi, maliyyə
vəsaitlərinə çıxışın təmin edilməsi və təlim vasitəsilə yerli
müəssisələrə dəstək, mədəni irs və idmanın inkişafına dəstək, eləcə
də hökumət qurumlarına texniki yardım daxildir.
