Bakı. Trend:
“S&P Global Ratings” agentliyi Azərbaycan Sahibkarlığın
İnkişafı Fondunun (ABDF) emitent üzrə uzunmüddətli kredit
reytinqini “BB-” səviyyəsindən “BB” səviyyəsinə qaldırıb. Proqnoz
sabitdir.
Bu barədə Trend “S&P Global Ratings”ə istinadən məlumat
verir.
Eyni zamanda, S&P Azərbaycan Sahibkarlığın İnkişafı Fondu
üzrə qısamüddətli “B” reytinqini təsdiqləyib.
Agentliyin məlumatına əsasən, 2025-ci ilin ortalarına
Sahibkarlığın İnkişafı Fondunun aktivləri 1,05 milyard manat
(təxminən 615 milyon ABŞ dolları), Azərbaycan İnvestisiya
Şirkətinin aktivləri isə 374 milyon manat (təxminən 220 milyon ABŞ
dolları) təşkil edib. Hər iki qurum sahibkarlığın dəstəklənməsi və
Azərbaycanın iqtisadiyyatının şaxələndirilməsinə yönəlib.
Beləliklə, Sahibkarlığın İnkişafı Fondu dövlətin güzəştli
kreditlərini banklar vasitəsilə təqdim edir, Sahibkarlığın İnkişafı
Fondu isə qeyri-xammal sahələrində ixrac və idxalı əvəzləyən
istiqamətlərdə fəaliyyət göstərən şirkətlərin azlıq paylarına
investisiya yatırır.
Qeyd edilib ki, ötən ilin sonunda Sahibkarlığın İnkişafı
Fondunun balansından 192 milyon manat (təxminən 112,9 milyon ABŞ
dolları) tam ehtiyatlaşdırılmış problemli kreditlər (Stage 3)
silinib. Bu kreditlər 2016–2020-ci illərdə lisenziyası ləğv olunan
maliyyə institutlarına aid idi. 2025-ci ilin ortalarına problemli
kreditlərin həcmi 9,7 milyon manata (təxminən 5,7 milyon ABŞ
dolları) qədər azalıb ki, bu da ümumi portfelin 1,4 faizini təşkil
edir. Halbuki bu göstərici 2023-cü ilin sonunda 24 faiz idi. Bu,
Azərbaycanın bank sektorundakı hazırkı problemli kreditlər
səviyyəsindən (5–6 faiz) xeyli yaxşı nəticədir.
Bildirilib ki, Sahibkarlığın İnkişafı Fondunun son beş ildə
verdiyi kreditlər nisbətən yüksək keyfiyyət nümayiş etdirib və geri
qaytarılmayanların sayı məhdud olub. 2024-cü ilin sonunda
ehtiyatlar ümumi portfelin 3 faizini təşkil edib və problemli
kreditləri iki dəfə örtüb. Azərbaycan İnvestisiya Şirkətinin yerli
şirkətlərdə pay alması üzrə ənənəvi fəaliyyəti Sahibkarlığın
İnkişafı Fondunun kiçik və orta sahibkarlara banklar vasitəsilə
təqdim etdiyi kredit portfeli ilə müqayisədə daha yüksək risk
daşıyır. Buna baxmayaraq, gözlənilir ki, birləşmiş strukturun
kapitallaşması (Riskə uyğunlaşdırılmış capital göstəricisinə görə)
çox yüksək səviyyədə qalacaq və bu da reytinqin artırılmasına səbəb
olub.
S&P agentliyi Azərbaycan Sahibkarlığın İnkişafı Fondunun
2025-ci ilə dair konsolidə olunmuş audit hesabatının (Beynəlxalq
Maliyyə Hesabatı Standartları üzrə) 2026-cı ilin iyununda dərc
ediləcəyini proqnozlaşdırır. Agentliyin proqnozu sabit olaraq qalır
və gözlənilir ki, ASİF çox yüksək kapitallaşmanı və məhdud risk
qəbulunu qoruyub saxlayacaq.
