Şuşa Teatrına həsr olunmuş “Ən uzun qastrol” filmi hazırlanıb.
Oxu.Az-a verilən məlumata görə, “Azəri Yurdu” Gənclər İctimai Birliyi Şuşa Dövlət Musiqili Dram Teatrının fəaliyyətindən bəhs edən sənədli film hazırlayıb.
Filmdə Şuşa Dövlət Musiqili Dram Teatrının tarixi, Şuşanın işğalından sonra teatrın üzləşdiyi çətinliklər, buna baxmayaraq yaradıcı kollektivin fədakarlıqları sayəsində bu mədəniyyət ocağının fəaliyyətini 30 il ərzində davam etdirməsi, nəhayət, yenidən doğma Şuşaya qayıda bilməyin onlara verdiyi sevinc və qurur hissi nümayiş olunur.
Film Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Azəri Yurdu” Gənclər İctimai Birliyi tərəfindən icra olunan “İşğal nəticəsində dağıdılan mədəniyyət ocağının tanıdılması” layihəsi çərçivəsində hazırlanıb.
Film Şuşa Dövlət Musiqili Dram Teatrının dörd aktyorunun müsahibəsi əsasında çəkilib. Filmin əsas süjet xətti 1990-cı ildə dövlət statusu alan Şuşa Teatrının doğma şəhərində tamaşa qoymaq arzusunun müharibə səbəbindən reallaşa bilməməsi, ilk səhnəni Bakıda reallaşdırması ilə son 30 ildə “ən uzun qastrol”a çıxmasına həsr olunub.
Həmçinin sənədli filmdə teatrın direktoru Yadigar Muradovun 30 il sonra Şuşa şəhərinə getməsi nümayiş olunur və o, teatrın dağıdılmış binasının yerinə çatarkən gözünün qarşısında Şuşada teatrın ilk səhnələşdirmək istədiyi “Arşın mal alan” tamaşasından Vəli və Tellinin dueti canlanır.
Filmin yerli telekanallarda, eləcə də sosial media platformaları üzərindən geniş auditoriyaya nümayiş olunması planlaşdırılıb.
Film “Azərbaycan Jurnalistlər Şəbəkəsi” İctimai Birliyinin yaradıcı heyəti tərəfindən istehsal edilib. Filmin ssenaristi və redaktoru Ayaz Mirzəyev, rejissoru – Zəka Qulu, operatoru isə Emin Hüseynovdur.
Filmin anonsunu təqdim edirik:
www.RIA24.az
