Gürcüstan XİN başçısı Ermənistanın Bakı-Tbilisi-Ceyhan kəmərinə zərbə endirmək cəhdinə münasibət bildirib

“Strateji obyektlər regionun təhlükəsizliyinin təminatıdır, ona görə də hər kəs onların normal fəaliyyətində maraqlı olmalıdır”.

APA xəbər verir ki, Gürcüstanın xarici işlər naziri David Zalkaliani erməni silahlı birləşmələrinin Bakı-Tbilisi-Ceyhan neft boru kəmərinə zərbə endirməyə cəhd göstərməsi ilə əlaqədar Azərbaycan Baş Prokurorluğunun yaydığı bəyanata münasibət bildirərkən belə deyib.

Nazir qeyd edib ki, bu cür strateji obyektlərin hərbi təhlükə altına qoyulmaması çox vacibdir:

“Bakı-Tbilisi-Ceyhan neft kəmərinin hər hansı hərbi təsirə məruz qalmaması vacibdir, bu, həm region, həm də regiondan kənar strateji önəm daşıyan bir obyektdir. Strateji obyektlər regionun təhlükəsizliyinin təminatıdır. Ona görə də hər kəs onların normal fəaliyyətinə təhlükə yaratmamaqda maraqlı olmalıdır.

Əlbəttə, Cənubi Qafqazdakı strateji əhəmiyyətli layihələr bizim ən böyük maraq sahəmizdir və biz davamlı olaraq bu istiqamətdə monitorinqlər aparırıq.

Biz regiondakı tərəfdaş ölkələrlə, xüsusilə də bu layihələrin ərazisindən keçdiyi ölkələrlə, həmçinin, strateji tərəfdaşlarımızla, ABŞ və Avropa İttifaqı ilə bu istiqamətdə danışırıq”.

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir