“Uşaqlar qırmızı lentli bombacıqları oyuncaq zənn edə bilərlər” – ANAMA-dan XƏBƏRDARLIQ

Hərbi sursatların zərərsizləşdirilməsi zamanı görürük ki, tapıntıların əksəriyyəti yaşayış məntəqələrindədir.

Bunu Bərdədə keçirilən brifinqdə Azərbaycan Respublikası Ərazilərinin Minalardan Təmizlənməsi üzrə Milli Agentliyinin Əməliyyatlar üzrə meneceri Elnur Qasımov bildirib.

Onun sözlərinə görə, zərərsizləşdirmə prosesi zamanı aşkarlanan tapıntıların əksəriyyəti mülki ərazilər, yaşayış məntəqələri, otlaq ərazilərdədir:

“Düşmənin məqsədi yaşayış məntəqəsində infrastruktura ziyan vurmaqdır. Burdan əhaliyə səslənirik. Ətrafda tanımadıqları əşyalar, obyektlər gördüklərində qətiyyən əl vurmamağa, aidiyyəti üzrə məlumat verməyə çağırırıq”.

E.Qasımov onu da əlavə edib ki, bizdə olan məlumata görə, düşmən tərəfindən Azərbaycanın Bərdə və Goranboy ərazisinə kaset sursatları atılıb:

“Bizim qruplar dərhal əraziyə gedərək təmizlənmə işlərini həyata keçiriblər. Gördüyünüz kaset bombacıqların üzərindəki qırmızı lent xüsusilə azyaşlı uşaqların diqqətini çəkir. Oyuncağı xatırladan bu bombacıqlar uşaqları cəlb edir və biz maksimum tez bir zamanda ərazini təmizləməyə və bu əraziləri işarələməyə çalışırıq. Əhalinin oraya daxil olmasının qarşısı alınır”. 

Könül Cəfərli

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir