“Mən sözümü bu adamın Prezident Aparatında “qılıncının dalı-qabağı kəsən” dövrdə demişəm” Bu günlərdə “Ana Vətən” partiyasının sədri, Milli Məclisin deputatı Fəzail Ağamalının Prezident Aparatının rəhbəri Ramiz Mehdiyevlə bağlı məşhur yazısı ictimaiyyətin diqqətini cəlb etməklə, həm də vaxtilə tənqidi çıxışalarına görə qınanan MMP sədri Hafiz Hacıyevin fikirlərinə “haqq” qazandırmış oldu. Belə ki, millət vəkili məlum yazısında “Boz kardinal” adlandırdığı Ramiz Mehdiyevi Azərbaycanda “5-ci kolon”un rəhbəri adlandıraraq, onu radikal müxalifəti hakimiyyətə qarşı qızışdırmaqda və demokratik islahatlara mane olmaqda günahlandırır. “Hələ də uzun illərdən bəri bitib-tükənməyən hikkə və ambissiyalarından əl çəkməyən, davamlı və sistemli xarakter daşıyan islahatlara maneçilik törətməyə cəhdlər göstərən, yaratdığı şəbəkə vasitəsilə ən müxtəlif üsullarla təxribatlara ara verməyən və bu gün də əməllərindən əl çəkməyən, iş otağını qərargaha çevirən, sözünə baxmaq istəməyənlərə hədə-qorxu gələn, şantaj edən “ağsaqqal”, yaşa dolduqca daha da aqressivləşir, kin-küdurət dolu düşüncə sahibinə çevrilir”-deyə, F.Ağamalı yazır.
Nazir və hökumət adamlarına qarşı belə sərt çıxışların əsas müəllifi olan Hafiz Hacıyevlə müsahibədə bu və ya digər məsələlərlə bağlı ortaya çıxan yeni nüanslara diqqət çəkmişik. Keçmiş PA rəhbəri Ramiz Mehdiyevin illər sonra Fəzail Ağamalının “hədəfinə” tuş gəlməsi nə ilə bağlıdır və bu, hansı yeni təhlükədən xəbər verir?
 “Nazir olmalıydım, Ramiz Mehdiyev imkan vermədi”– Hafiz müəllim, illərdir sizin Azərbaycanda “5-ci kolon”un olması və buna Ramiz Mehdiyevin rəhbərlik etməsi ilə bağlı SOS çıxışlarınız, bu dəfə millət vəkili Fəzail Ağamalının prizmasında gündəmə gətirilib. Nə baş verir, buna zərurət nədən yarandı?
– Mən sözümü hələ “5-ci kolon”a rəhbərlik edən adamın Prezident Aparatında əlinin “dalı-qabağı kəsən” dövrdə demişəm. Fakt olaraq 2010-cu il 17 may tarixində “Xural” qəzetində gedən 2 səhifəlik müsahibəmi göstərə bilərəm. Orda bu güngkü vəziyyəti bütün detalları ilə adba ad ortaya qoymuşam. Həmin ərəfədə Ramiz Mehdiyevin qılıncının dalı da kəsirdi, qabağı da kəsirdi, heç kəs ona bir söz deyə bilmirdi. Hətta bəzən məni bugünkü nazirlər, bu gün aparatda oturan Zeynal Nağdəliyev kimiləri qınayırdılar. Amma mən onun Prezidentə xəyanət etməsinə susa bilməzdim və hər şeyi açıb ortaya qoyurdum. Amma çox təəssf ki, həmin dövrdə Ramiz Mehdiyevə “qaşın üstündə gözün var” deyən yox idi. Mən dedim və hardasa 25 il bunun əziyyətini çəkdim. İmkan vermədilər seçildiyim dairədən deputat olam. Mən nazir olmalıydım, Ramiz Mehdiyev imkan vermədi. “Əhatəsində olan qəzet və saytlara məni söydürürdü, adımı da “balıq Hafiz” qoydurmuşdu”– Nəyə görə imkan vermədi?
– Ramiz Mehdiyev həmişə mənə deyirdi ki, sən mənə işlə. Bu barədə öz nazirləri, köməkçiləri ilə xəbər göndərirdi. Köməkçisi Şamama xanım var idi, o, və digəriləri mənimlə əlaqə saxlayırdılar. Hamısı da mənə deyirdilər ki, Ramiz müəllim deyir ki, sən mənə işləməlisən. Deyirdim ki, işləmək nətər olur. Deyirdilər ki, sən Prezidenti tənqid etməlisən, Mehtriban xanımı tənqid etməlisən. Deyirdim ki, mən ona qardaş demişəm, heç vaxt onu edə bilmərəm. Deyirdim ac da qalsam, susuz da qalsam, yenidən həbsə girsəm də, o məsələlər mənlik deyil.  Bunu o vaxt mən deyəndə çoxları az qalırdılar məni həbsə göndərsinlər, bu gizli də deyil. Mənim o qəzetdəki çıxışlarımı sayta versəniz insanlar görəcək ki, Hafiz Hacıyev bəziləri kimi indi ayılmayıb, hələ 10 il qabaq bu məsələləri deyib.
O vaxtlar dinc vaxtımda da məni sakit buraxmırdılar. Adicə Gəncəyə anamın yanına gedəndə nazirlər var idi ki, məni aeroportdan qaytardılar ki, sən nə iş görürsən, o bizim ağsaqqalımızdır, o olmasa bu ölkə dağılar, sən İlham Əliyevə yox, ona işlə. Yəni bunlar hamısı faktlardır və həmin insanalar bu gün də cənab Prezidentin ətrafındadır, yenə də ona xəyanət etməklə məşğuldular. Hafiz Hacıyev bunu deyəndə, onda Fəzail Ağamalılar və digəriləri harda idi?!.
Amma gec də olsa danışırlarsa, yenə də alqışlayıram. Eybi yoxdur, qoy məndən öyrənsinlər. Söhbət ondan gedir ki, indi qəhrəman kimi ortaya çıxanlar sanki təzə söz deyirmiş kimi, mənim müəlliflik hüququmu pozurlar. Heç olmasa bu barədə danışanda, demirlər ki, Hafiz Hacıyev biz qorxub danışmayanda, filan tarixdə, filan qəzetdə bu barədə danışıb.  Amma bu gün indi təzədən yeni qəhrəmanların ortaya çıxıb belə danışmaları, artıq gecdir, “daldan atılan daş topuğa dəyir”. Hər halda Hafiz Hacıyev zamanında dövlətçilik üçün nə lazımdırsa eliyib. O vaxtlar məni qeyri-ciddi siyasətçi adlandırmaq istəyən Ramiz Mehtiyev əhatəsində olan saytlara məni söydürürdü, adımı da “balıq Hafiz” qoydurmuşdu. Ramiz Mehtiyevin İlham Əliyevə etdiyi xəyanətləri Azərbaycanda heç kim heç kimə eləmiyib. Bu gün də o xəyanətlər davam edir Və nə ilə nəticələnəcək, onu Allah bilir.
“Bunu Fəzail bəy də, Mübariz Qurbanlı, hörmətli Əli Əhmədov da, hamısı bilir”– İndi Fəzail Ağamalı sizin bu çıxışınızdan sonra iddia edə bilər ki, siz bilmirsiz, zamanında çox demişəm..
– Məndə olan məlumata görə Fəzail Ağamalının da o vaxtlar nəsə mübarizəsi olub, amma sonra necə “dil tapdılar” bilmirəm. Amma zamanında səngərdə döyüş aparan mən idim. Bunu Fəzail bəy də bilir, Mübariz  Qurbanlı da bilir, hörmətli Əli Əhmədov da bilir, bunların hamısı bilir. Bunların hamısı mənə irad tuturdular ki, “sən niyə belə hərəkət edirsən, bu bizim ağsaqqalımızdır, sən bundan yapış”… Sən demə xəyanət etmək lazım imiş. Axı xəyanət edənlərin bəxti kəsir. Əslində iki adamın bəxti kəsir, üzr istəyirəm, onun birini demək istəmirəm – biri xəyanətkarların, bir də “nəbilim nələrin”…
Bunları deməkdə məqsədim budur ki, Azərbaycan dövlətçiliyinin, millətimin gələcəyi naminə özümü riskə atmışam, peşiman da deyiləm. 30 il mərhumiyyətlər, əziyyətlər çəkdim, Ramiz Mehtiyev 2 dəfə məni həbsxanaya atdırdı. İlham Əliyevin haqqında onun müşavirinə dediyi ən iyrənc sözü var. Lazım olan anda onun da adını çəkə bilərik ki, şahid kimi dindirilsin. Bu gün də çox ciddi şəkildə cənab Prezidentə xəyanət edirlər. Ölkədə çevriliş hazırlayırlar. Ramiz Mehdiyevin kabineti bu gün olub qərargah. Nədən qorxurlar, nədən çəkinirlər, niyə bu adamlar həbsə getməməlidir, niyə bu gün bu adamların övladları ən yüksək vəzifələrdə olmalıdır, niyə bu adamın xanımının adına Novxanıda min hektarlarla bağ olmalıdır, bunların hansı xidmətlərinə görə. Heydər Əliyevə söydürdüklərinə görə. Biz o vaxt Heydər Əliyevi hakimiyyətə gətirəndə Qaralovun bir mülkü var idi, həmişə orda yığışırdıq. Bu, ulu öndərə siyasi meyit deyirdi. Bu yaddan çıxmayıb axı. Mən bunlara qarşı mübarizə aparırdım. Çox təəssüf ki, mənim mübarizəm səmərə verdiyi anda kimlərsə mənə şərik çıxırlar. Məni sevindirən odur ki, heç olmasa cənab Prezident gördü ki, Hafiz Hacıyevin 10 il qabaq dedikləri, bu gün öz təsdiqini tapdı. Əlimdə olan faktları göndərmişəm qoy özləri baxsınlar və görsünlər ki, mən kim olmuşam və nə demişəm.
 “Ramiz Mehtiyev yenə hamısını gətirdi parlamentə sırıdı, indi də biri ağzını açmır”– Nə baş verir ki, həmin məsələ bu gün Fəzail Ağamalı tərəfindən qabardılır?
– Sizə açıq deyim ki, artıq Ramiz Mehtiyevin xəyanətləri açıq xarakter alıb. Burda Rusiya ilə Avropanın, Qərbin müharibəsi gedir. Azərbaycan Prezidenti son günlər Avropaya, Qərbə inteqrasiya məsələsini qaldıran kimi Rusiya burda öz vassallarını işə salır. Bu birmənalı şəkildə belədir. Rusların da burdakı nümayəndəsi Ramiz Mehdiyevdir və onun ətrafındakılardır. Axşama qədər Ziya Məmmədov, o, digər keçmiş nazirlər, bağlarda, digər yerlərdə görüşlər keçirirlər.  Ortalıqda vasitəçilik edənlərin kim olduğunu da biz bilirik. Biz bunların hamısını zaman-zaman görmüşük, bu gün də görürük.  Ona görə də biz cənab Prezidentə yaxından kömək eləməliyik. Umu-küsülələri kənara atmalıyıq. Onların təyin etdiyi deputatlar, elə birini mənim yerimə qoyublar, ağzlarını açıb danışa bilməzlər. Ona görə ki, onlar da Kərimov Əli əxlaqda olan adamlardır. Ramiz Mehtiyev yenə hamısını gətirdi parlamentə sırıdı, indi də biri ağzını açmır. İndi Fəzail bəy məndən nümunə götürüb, buna da peşman deyiləm. Əsas odur ki, həqiqətləri desin, mənim dediklərimi təkrar eləsin.  Mən 2010-cu ildə çap olunduğum qəzetin surətini ona da göndərə bilərərm. Ordan da müəyyən məlumatlar ala bilər.
Hər halda mən axıra qədər mübarizə aparacam ki, ölkədə dövlətimə, dövlətimizin müstəqilliyinə və dövlət başçısına xələl gəlməsin. Bu bizim amalımızdır, bu amaldan da geri dönən deyil.
 “Azərbaycanda radikal qüvvələri həmişə Ramiz Mehdiyev maliyələşdirib”– Hafiz müəllim, siz, elə Fəzail Ağamalı da bu gün Ramiz Mehtiyevlə bərabər Ziya Məmmədovun, Füzuli Məmmədovun adını çəkir və keçmiş nazirlərin tez-tez toparlandığını deyirsiz. Bu məsələlərin üzərinə daha çox gedən bir siyasətçi olaraq, necə hesab edirsiz, hansı gizli planlar hazırlanır. Xariclə – Rusiya ilə hansı əlaqələr qurulur və onların radikal müxalifətlə hansı əlaqələri var?
– Azərbaycanda radikal qüvvələri həmişə Ramiz Mehtiyev maliyələşdirib. Mən bunu dəfələrlə demişəm, bu gün də həmin fikrimdə qalıram və əlimdə də kifayət qədər faktlar var.  Yadınızdadırsa, Şəhid ailələri ilə bağlı “fəvvarələr” meydanında mitinq təşkil edilmişdi, orda da Ramiz Mehtiyevin tapşırığı olmuşdu. O cümlədən Eldar Mahmudovun rəhbərliyi ilə Kərimov Əliyə, Həsənov Cəmilə pul verib onları qızışdıran, onların başında duran bu insan idi. Bunların hamısını mən zamanında, elə mitinq ərəfəsində dedim. Buna ciddi reaksiya verilməsini təklif etdim. Çox təəssüflər olsun ki, reaksiya verilmədi. Xaricdə prezidentə, ailəsinə böhtan artan internet kanallarının hamısının başında Ramiz Mehtiyev durur.  Hamısının sifarişçisi Ramiz Mehtiyevdir və mən zamanında bunun hamısını bir-bir demişəm və əlimdə ciddi faktlar olub. Heç vaxt əsassız fikir irəli sürməmişəm. Ona görə də məni risk edib tutdura bilməyiblər. Tutdursaydılar, daha ciddi faktlar ortaya qoyardıq. Sadəcə Ramiz Mehtiyev indiki gedişini həzm edə bilmir. Buna çox ciddi göstəriş veriblər ki, Azərbaycanda sabitliyi pozmalısan, dövlət çevrilişi etməkdən ötrü bütün qüvvələri səfərbər etməlisən. Bu gün Ramiz Mehtiyevin əlində Azərbaycan dövlətindən oğurladığı milyardlar var. Onun ətrafına yığdığı Ziya Məmmədovun Azərbaycan dövlətindən oğiurladığı milyardları var. Bunların hamısı faktlardır, bunları gizlətmək olmaz. O cümlədən keçmiş nazirlərin hamısı.
Bu günlər də narazılığı Ramiz Mehtiyev ən sadiq əlaltısı olan  Zeynal Nağdəliyev yaradır. O, 2003-cü ildən Azərbaycana gəlib. O bura gələndə rəhmətlik Heydər Əliyev xəstə idi, ağrıyırdı. Onu Lənkəranın icra başçısı Ramiz Mehtiyevlə kirvə olan Azərbaycan Mədəniyyət naziri, Azərbaycanın sərvətini oğurlayıb arvadı vasitəsi ilə xaricə ötürən Əbülfəz Qarayev və dövlətin malını talan edən keçmiş nazir Fərhad Əliyev təyin etdirib. Bunu ilk dəfə deyirəm. 2003-cü ilə qədər Zeynal Nağdıliyev harda olub, nə ilə məşğul olub, Rusiyada kimin əlaltısı olub? Sonra Ramiz Mehtiyev onu gətirdi Aparata. Görürsüz, narazılıqların hamısı rayonlardan başlayır – icra hakimlərinin özbaşınalığı, su qıtlığı, torpaq satışı, insanlara öz işini qurmağa imkan verilməmə… Bunlar hamısı Zeynal Nağdəliyevin rəhbərliyi altında milləti Prezidentin üzərinə qaldırmaqdan ötrü çox böyük projedir. Bunlar hamısı faktdır. Etirazları varsa versinlər məhkəməyə, məhkəmədə çəkişək. Məndə Ramiz Mehtiyev, Nağdəliyev, onun ətrafında olan dirəşən nazirlər haqqında çox ciddi faktlar var. Kimlərsə bilmək istəyirsə, verə bilərərm. Mən əbəs yerə Ziya Məmmədovla düşmən olmadım ki… Ziya Məmmədov deyirdi ki, Prezident bizə imkan vermir, qazandığımızın yalnız 5 faizi bizə qalır.  Mən bu məsələləri cənab Prezidentin özünə çatdırmışam. Çox təəssüf hissi keçirirəm ki, 10 ildən sonra dediklərim öz təsdiqini tapdı. Bəzən mənə deyirlər münəccimsən? Mən münəccim deyiləm, mən təhlillərlə işlyirəm. Mən həyatımı Kərimov Əlilər, başqaları kimi meydanlarda yox, vəzifə başında qurmuşam. Mən 25 il komsomolda katib olmuşam, siyasi məktəb keçə-keçə gəlmişəm. Ona görə də mən imkan verməyəcəm ki, Prezidentə xəyanət olsun. Onu təkləsinlər. Bu gün onun küncə sıxışdırılması gedir. Dağlıq Qarabağ məsələsi ilə bağlı ciddi bəyanat verən kimi, dərhal Azərbaycanda ermənilərlə qohum olan adamlar ayağa qalxır. Bu da məni narahat edir. Mən bunu 10 il əvvəl deyəndə az qalırdılar ətimi şişə taxsınlar. O vaxt məni yanlarına çağırıb Ramiz Mehdiyevə xidmət eliyək, prezidentə gücü çatmır deyənlər, bu gün Prezidentin yanındadırlar. Bu günlərdə saytların birində bir şəkil verilmişdi, ad çəkmək istəmirəm, biri Zeynal Nağdəliyev, bir Prezidentin yanında siyasi vəzifələrdən birini tutan adam da iştirak edirdilər. Bu gün zamanında məni Ramiz Mehtiyevə baş əyməyə çağıran nazirlər Prezidentə baş əyirlər. Ona görə də 30 ildir bizə nə parlamentdə yer veriblər, nə layiq olduğumuz vəzifəyə getməyə inkan verməyiblər. Biz dövlətimizi, dövlət başçımızı sevdiyimizə görə bu gün küçələrdə qalmışıq.
 “Bunlar qohumdurlar, belə olan halda ermənilərə güllə atan deyillər ki…”– Dedinz ki, imkanlardan məhrum oldunuz, amma Fəzail Ağamalı bu barədə danışsa da, yenə də milli məclisdə oturur və imkanları da genişdir. O zaman yanlışlıq harda? Sizdə, yoxsa zamanı düzgün seçə bilməməyinizdə?..
– Bəli, Fəzail bəy Milli Məclisdədir. Allah özünə qismət eləsin, hər bir şəraitlə təmin olunub. O zaman mən dediklərimə Ağamalı və digərləri zamanında dəstək verib, qiymət verilsəydi, düşünürəm ki, bu cür gərginlik yaranmazdı, Dağlıq Qarabağ torpaqları çoxdan işğaldan azad edilmişdi. Amma dediyim kimi, bunların bu günkü “həyəcanı” “daldan atılan daşdır”.
Mən bilirəm ki, o adamlar ermənilərlə çox sıx əlaqədədir, Sevan gölünün ətrafında adını çəkdiyim ünsürlərin böyük obyektləri var, böyük pansionatlar salıblar. Bunlar qohumdurlar, belə olan halda ermənilərə güllə atan deyillər ki… İndi xalq nədən narazıdır – Dağlıq Qarabağın işğaldan azad edilməməsindən, rayonlardakı özbaşınalıqlardan, hərcmərclikdən, onlara qarşı olan ögey münasibətdən, qanunsuzluqlardan. Bunları da başladan bu adamlardır. Mən sözümü demişəm və bu günə qədər küçələrdə ac qalıb dilənənlədən biri də mənəm, Ramiz Mehtiev mənə imkan verməyib. Məni Kənd Təsərrüfatı naziri qoymaq istəyirdilər. Amma Ramiz Mehtiyev şəxsi işimə fərman verməyə qoymadı. Mən nazir olsaydım bu gün Azərbaycanda bu qədər qıtlıq olardımı, yox! Ramiz Mehtiyev gəldi elə adamı sırıdı ki, ora, nə quzunu tanıyır, nə də keçini. Gedir deyir, baramıya su verirsiz? Baramıya su verilmir axı.
Amma onun iki qardaşını pul alıb nazir mavini qoydurub. İmza çəkə bilməyənin birini Xızıda icra başçısı edib.
Bunları gərək mən deyib düşmən qazanam? Təbii ki, qazanmışam, kimə görə dövlətimə görə, dövlət başçısına olan sədaqətimə görə.