“Həm Türkiyənin qurucu lideri Mustafa Kamal Atatürkün, həm də Azərbaycan dövlətinin inkişafında müstəsna xidmətləri olan Heydər Əliyevin prinsipləri əsasında yaranan Azərbaycan və Türkiyənin sarsılmaz müttəfiqliyi bütün dünyaya nümunədir”.
Bu fikirləri “Report”un Ankara bürosuna Hacettepe Universitetinin rektoru, professor Mehmet Cahit Güran bildirib.
Atatürkün “Azərbaycanın sevinci sevincimiz, kədəri kədərimizdir”, Heydər Əliyevin “Bir millət, iki dövlət” fikirlərini xatırladan rektor bildirib ki, hər iki liderin qoyduğu bu prinsiplərin yolu ilə gedən Azərbaycanla Türkiyə türk birliyinə zəmin yaradıblar:
“Türkiyə və Azərbaycanın ulu öndərlərinin qoyduğu yol Türk Dövlətləri Təşkilatı kimi qüdrətli bir ittifaqın yaranmasına səbəb oldu. Getdikcə böyüməkdə olan bu birlik türkə xor baxanlara yerini tanıdır. Yəni bütün bunlar da Atatürk kimi, Heydər Əliyev kimi nadir şəxsiyyətlərin uzaqgörən siyasətlərinin nəticəsidir”.
Rektor xatırladıb ki, 1918-ci ildə Nuru Paşanın komandanlığı ilə Türk Qafqaz İslam Ordusunun Bakıya gələrək gərgin mübarizələr nəticəsində Bakını işğaldan azad etməsi Heydər Əliyev tərəfindən yüksək qiymətləndirilib. Bunu da təqdirolunan nümunə hesab etmək olar:
“Mərhum Əliyev təsbitlərində bu dövrü xüsusi vurğulayaraq, “Türk ordusunun Azərbaycana, Bakıya gəlməsi, Azərbaycanı daşnakların təcavüzündən xilas etməsi hər bir azərbaycanlının qəlbində yaşayır. Azərbaycan xalqı həmin ağır dövrdə türk xalqının ona göstərdiyi köməyi və yardımı heç vaxt unutmayacaqdır” deyə ifadə etməsi bugünkü nəslə çox mühüm mesajlar verir.
Heydər Əliyev müstəqillik təməli 1918-ci ildə qoyulan Azərbaycanın inkişafı üçün həyatı boyunca mübarizə aparıb. O, bir tərəfdən, siyasi arenada, digər tərəfdən, hərbi sahədə strategiya və komandanlıq məsələlərində Türkiyə Respublikası ilə faydalı əməkdaşlıq qurub, dövlətin təhlükəsizliyi ilə yanaşı, siyasi, iqtisadi, mədəni və sosial maraqlarına uyğun olaraq xarici ölkələrlə dostluq mühiti yaratmağa çalışıb. Dövlətlər üçün önəmli şəxsiyyət olan Heydər Əliyev kimi nadir insanların hər zaman ehtiramla yad ediləcəyinə inanıram”.
www.RIA24.az
